बैतडी- बलात्कारको आरोप लागेका बैतडीको पुर्चौडी बहुमुखी क्याम्पस प्रमुख राजेन्द्र नेगीले गिरफ्तारी दिएका छन् । कैलालीकी एक मजदुर महिलामाथि बलात्कार गरेको आरोप लागेका निर्वतमान क्याम्पस प्रमुख नेगीले आइतबार गिरफ्तारी दिएका हुन् ।
नेगीले आफै जिल्ला प्रहरी कार्यालय पुगेर गिरफ्तारी दिएका जिल्ला प्रहरी कार्यालय बैतडीका प्रहरी निरीक्षक प्रहरी प्रवक्ता लोक राज जोशीले जानकारी दिए ।
गत असार २९ गते नेगीविरुद्ध पिडीत मजदुर महिलाले दिएको जाहेरीका आधारमा इलाका प्रहरी कार्यालय पाटनमा जबरजस्तीकरणीको मुद्दा दर्ता गरिएको थियो। मुद्दा दर्ता भएपछि प्रहरीले उनको खोजी कार्य गरिरहेको थियो ।
तर आइतबार नेगी आफै झुट्टा अरोप लगाएर आफ्नो बदनाम गर्न खोजिएकोले अुसन्धान प्रक्रियामा प्रहरीलाइ सघाउन आफै गिरफ्तारी दिएको बताएका छन् । उनले आइतबार विज्ञप्ती जारी गरेर व्यक्तिगत प्रतिष्ठा र मार्यादा माथि प्रहार हुने किसिमले आरोप प्रत्यारोप एवं चरित्र हत्या गर्ने सुनियोजित तरिकाले फसाउन खोजिएपछि घट्नाको अुसन्धान प्रक्रियामा सघाउन गिरफ्तारी दिएको बताएका हुन् ।
नेगीले घट्नाको सत्य तथ्य छानबिन हुनपर्ने समेत माग गरेका छन् । नेगीले बलात्कारको आरोप लागेपछि गत असार २७ गते क्याम्पस प्रमुख पदबाट राजीनामा दिएका थिए । गत असार २० गते पानी माग्ने निहुँमा आफुमाथि नेगीले बलात्कार गरेको महिलाले आरोप लगाएकी छिन् ।
नेगी आफैँ प्रहरी कार्यालय पुगेपछि उनीविरुद्धको मुद्दामा अनुसन्धान अघि बढेको जिल्ला प्रहरी कार्यालय बैतडीले जनाएको छ ।
