बैतडी- जिल्ला समन्वय समिति बैतडीको नव निर्वाचित कार्य समितिले भवनको निर्माण कार्यलाइ तिब्रताका साथ अगाडी बढाउने निर्णय गरेको छ । बुधबार बसेको  पहिलो  बैठकले सो निर्णय गरेको  हो ।

समन्वय समिति प्रमुख खगेन्द्र धामीको अध्यक्षतमा बसेको पहिलो बैठकले निर्माणाधीन अवस्थामा रहेको जिल्ला समन्वय समितिको भवनको निर्माण कार्यलाइ तिब्रता दिने निर्णय गरेको बताइएको छ ।  अलपत्र  परेको भवनको निर्माण कार्यलाइ अगाडी बढाउन उपप्रमुख दमन कुवँरको संयोजकत्वमा ३ सदस्यीय समिति समेत गठन गरिएको समन्वय समितीका सदस्य प्रेम सिंह भाटले जानकारी दिए ।

यस्तै हरेक महिनाको ५ गते समन्वय समितिको बैठक बस्ने,  जिल्लामा रहेका १० वटै पालिकाहरु, प्रदेश सरकार र संघीय सरकार संग समन्वय गरेर  अनुगमन कार्यलाइ अगाडी बढाउने पनि  बैठकले निर्णय गरेको उनले  बताए  । जिल्ला समन्वय समिति बैतडीको नयाँ नेतृत्व छानीएको  छ ।मंगलबार भएको  निर्वाचनबाट जिल्ला समुन्वय समितिको  नयाँ नेतृत्व छानिएको  हो  ।

 नेतृत्वका लागि नेपाली कांग्रेस, माओवादी केन्द्र र स्वतन्त्रबीच गठबन्धन भएको थियो । जिल्ला समन्वय समिति  बैतडीको प्रमुखमा नेपाली कांग्रेसका खगेन्द्रसिंह धामी र उपप्रमुखमा माओवादीका दमन कुवर विजयी  भएका छन् । यस्तै समन्वय समितिका सदस्यहरुमा पनि गठबन्धनकै उम्मेदवार विजयी भएका छन् ।