बैतडी– बैतडीको पाटन नगरपालिका वडा न. १० का नेपाल कम्युनिस्ट पार्टी (नेकपा) वडा कमिटी अध्यक्ष देव दत्त पन्तले पार्टीको साधारण सदस्यसमेत नरहने गरी पार्टी परित्यागको घोषणा गरेका छन् । विगत २१ वर्षदेखि निरन्तर पार्टीमा सक्रिय रहँदै आएका पन्तले शुक्रबार सामाजिक संञ्जालमार्फत विज्ञप्ति जारी गर्दै पार्टी परित्याग गरेको जानकारी गराएका हुन् ।
पार्टीभित्र बढ्दै गएको बेथिति, घुसखोरी र कमिसनखोरीप्रति आपत्ति जनाउँदै उनले पार्टी परित्याग गरेको घोषणा गरेका हुन् ।
सामाजिक संवालमा पार्टीका अगुवा कार्यकर्ताहरूमा चरम लापरवाही, सेटिङ र कुसंस्कार हाबी भएको र यस्ता गलत प्रवृत्तिले देश विकासमा अवरोध पु¥याउने भएकाले पार्टीमा बसिरहन नसकिएको पन्तले उल्लेख गरेका छन् ।
“मैले दुई दशकभन्दा बढी समय आफ्नो क्षमता, समय र श्रमले भ्याएसम्म पार्टीको नीति, सिद्धान्त र संगठनका लागि योगदान गरेँ,“ पन्तले विज्ञप्तिमा भनेका छन्, “तर पार्टीभित्रका कुरीति र बेथितिलाई आत्मसात् गर्न नसकिने र मेरो व्यक्तिगत विचार तथा राजनीतिक मान्यता अनुसार अघि बढ्न नसकिने निष्कर्षमा पुगेर यो निर्णय लिएको हुँ ।"
पन्तले आफ्नो लामो राजनीतिक यात्राका क्रममा साथ र सहयोग पु¥याउने सम्पूर्ण नेता, कार्यकर्ता तथा शुभचिन्तकहरूप्रति आभार व्यक्त गरेका छन् । पार्टी छाडे पनि आगामी दिनमा जनताको हकहित, सामाजिक न्याय, सुशासन र समृद्धिका पक्षमा क्षमता अनुसार निरन्तर क्रियाशील रहने प्रतिबद्धता जनाएका छन् ।
