बैतडी –बैतडीमा टिप्पर दुर्घटना हुँदा ४ जना घाइते भएका छन् । धनगढीबाट इँटा बोकेर बैतडी आउँदै गरेको म १ क ३८८ नम्बरको टिप्पर दशरथचन्द राजमार्गको पाटन नगरपालिका ६ कनेडा मोडमा बिहीबार दिउँसो दुर्घटनामा परेको हो ।
दुर्घटना परी टिप्पर चालक कञ्चनपुरको बेदकोट नगरपालिका ५ का सन्तोष डगौरा, सहचालक भीमदत्त नगरपालिका ४ का विरेन्द्र चौधरी, बैतडीको पाटन नगरपालिका ३ का हिरा विक र पाटन नगरपालिका ४ का हरिना ऐरी महरा घाइते भएका छन् ।
घाइते चारैजनालाई उपचारका लागि एम्बुलेन्स मार्फत डडेल्धुरा अस्पताल पठाइएको जिल्ला प्रहरी कार्यालयका प्रवक्ता प्रहरी निरीक्षक मोहनबहादुर साउँदले बताए । घाइते मध्ये दुई जनाको अवस्था गम्भीर रहेको उनले बताए । हिरा विक र चालक सन्तोष डगौंराको अवस्था गम्भीर रहेको प्रहरी प्रवक्ता साउँदले बताए । विकको ढाड र डगौंराको टाउकोमा चोट लागेको बताइएको छ ।
टिप्पर सडकबाट करीब ३ सय मिटर तल खसेको छ । दुर्घटनाको कारण भने पत्ता लागेको छैन् ।
