बैतडी- बैतडीमा फोटोसहितको मतदाता नामावली संकलन भइरहेको छ । आउँदो प्रतिनिधिसभा तथा प्रदेशसभा सदस्य निर्वाचनलाई ध्यानमा राखेर अहिले फेरी मतदाता नामावली संकलन भइरहेको हो ।
स्थानीय तह निर्वाचन, २०७९ को मिति घोषणा भएपछि माघ २५ गतेदेखि मतदाता नामावली संकलन तथा अद्यावधिक गर्ने कार्यक्रम स्थगित गरिएकोमा असार १ गतेबाट पुनः सुरु भएको जिल्ला निर्वाचन कार्यालय बैतडीका प्रमुख माधवप्रशाद फुयालले जानकारी दिए ।
उमेर पुगेर पनि स्थानीयतहको निर्वाचनमा मतदाता परिचय पत्र नभएर मताधिकार प्रयोग गर्न बाट बञ्चीत भएकाहरुलाइ निर्वाचन कार्यालय बैतडीले फोटो सहितको मतदाता नामावलीमा नाम दर्ता गराउन आग्रह गरेको छ । अहिले आउँदो प्रतिनिधिसभा तथा प्रदेशसभा सदस्य निर्वाचनलाई मध्यनजरमा राखेर आयोगले सो कार्यक्रम पुनः सञ्चालनमा ल्याएको हो ।
जिल्ला निर्वाचन कार्यालय प्रमुख फुयालले नागरिकता लिएका र मतदाता नामावली ऐन, २०७३ बमोजिम योग्यता पुगी नाम दर्ता गर्न छुट भएका सबैलाइ जिल्ला निर्वाचन कार्यालय, जिल्ला प्रशासन कार्यालय र इलाका प्रशासन कार्यालयमा गई आ–आफ्नो नाम दर्ता गराउन आग्रह गरेका छन् ।
अहिले जिल्ला निर्वाचन कार्यालय बैतडी, जिल्ला प्रशासन कार्यालय बैतडी र इलाका प्रशासन कार्यालय पुर्चौडी हाटबाट मतदाता नामावली संकलनको कार्य भइहरेको जिल्ला निर्वाचन कार्यालय बैतडीले जनाएको छ । निर्वाचनको मिति घोषणा नहुँदा सम्म संकलनको काम जारी रहने बताइएको छ ।
