बैतडी –बैतडीको दोगडाकेदार गाउँपालिकाले आगामी आर्थिक बर्षमा ‘उपाध्यक्षको कोसेली’कार्यक्रमलाई निरन्तरता दिने भएको छ । गर्भवती तथा सुत्केरी महिलाहरुलाई लक्षित गरेर सञ्चालन गरिएको कार्यक्रमलाई निरन्तरता दिइने गाउँपालिकाकी उपाध्यक्ष पार्वती कार्कीले बताइन् ।
गर्भवती तथा सुत्केरी भएको बेला आमालाई थप पोषिलो खानेकुराको आवश्यकता पर्ने भएकाले यो बिषयमा घरपरिवारलाई जागरुक बनाउन यो कार्यक्रम सञ्चालन गरिएको उनले बताइन् ।
यस्तै संस्थागत सुत्केरीको संख्या बढाउन पनि ‘उपाध्यक्षको कोसेली’कार्यक्रमले सहयोग गरेको दोगडाकेदार गाउँपालिकाका स्वास्थ्य शाखा प्रमुख नरेन्द्र नाथले बताए । स्वास्थ्य संस्थामै प्रसुती हुन आउने र नियमित गर्भजाँच गराउने आमालाई कोसेली दिने गरिएकाले संस्थागत सुत्केरीको हुनेको संख्यामा वृद्धि भएको उनले बताए ।
स्वास्थ्य संस्थामै बच्चा जन्माएमा आमा र बच्चा दुवैलाई सहज हुने, मातृमृत्यु र शिशु मृत्यु नहोस भनेर यो कार्यक्रम सञ्चालन गरिएको उनले बताए ।
उपाध्यक्षको कोसेलीमा समावेश गरिने सामग्रीमा यो बर्षदेखि केही कुरा थपिने उपाध्यक्ष कार्कीले बताइन् । कोसेली पोषिलो खानेकुराका साथसाथै सरसफाइका सामग्री समेत राख्ने गरिएको छ ।
