बैतडी –बैतडीको दशरथचन्द नगरपालिका वडा नं २ देहीमाण्डौंमा घरपालुवा पशुहरुमा अज्ञात रोग देखिएपछि किसानहरु चिन्तित बनेका छन् । घरपालुवा पशुहरुमा र्याल चुहाउने, घाँस नखाने,ज्वरो आउने, खुरहरु सुन्निने लगायतका लक्षणहरु देखा परेका स्थानीय गणेश बोहराले बताए ।
पशुहरुमा अज्ञात रोग देखिएपछि स्थानीयस्तरमै पशु प्राविधिक खटाएर उपचार कार्य थालिएको दशरथचन्द नगरपालिका वडा नं २ का वडा अध्यक्ष सूर्यबहादुर बोहराले बताए । समस्या भएका ठाउँमा वडा कार्यालयमा सम्पर्क राख्न समेत उनले आग्रह गरेका छन् । उनले भने ‘वडाबासीहरुका समस्या समाधानका लागि हामीले सक्दो प्रयास गरिरहेका छौं । पशुहरुमा रोग देखिएका ठाउँका किसानहरुलाई वडामा खबर गर्न आग्रह गर्दछौं ।’
रोग देखिएका पशुहरुलाई अलगै राख्न, चराउन वनमा नलैजान र पशुप्राविधिकहरुको सहयोगमा औषधि उपचार गर्न समेत वडा अध्यक्ष बोहराले आग्रह गरे । अहिले पनि दुई जना पशु प्राविधिहरुलाई खटाइएको उनले बताए ।