बैतडी –गत शुक्रबार राति रोल्पाको माडी गाउँपालिका–४ माडी खोलामा जीप दुर्घटना हुँदा बेपत्ता भएका चालकको शव फेला परेको छ । दुर्घटनामा घाइते भएका सहचालक बैतडीको पाटन नगरपालिका–४ का २२ वर्षीय मनोज चन्दको उपचार भइरहेको छ । उनको लुम्बिनी प्रादेशिक अस्पताल बुटवलमा उपचार भइरहेको प्रहरीले जनाएको छ ।

दुर्घटनामा परी खोलामा बेपत्ता भएका चालकको शव भने ४ दिनपछि फेला परेको हो । चालक नुवाकोटको ककनी गाउँपालिका–३ का ३१ वर्षका वुद्धिबहादुर लामाको शव मंगलबार भेटिएको प्रहरीले जनाएको  छ । 

शहीद मार्गको माडी गाउँपालिका–४ सिस्ने बजारबाट घर्ती गाउँतर्फ आउँदै गरेको बा ७ च ५००२ नम्बरको जिप सडकबाट अन्दाजी १०० मिटर तल माडी खोलामा खसेको थियो । दुर्घटनाबारे अनुसन्धान भइरहेको जिल्ला प्रहरी कार्यालय रोल्पाले जनाएको छ ।