बैतडी –लैंगिक हिंसा प्रभावितहरुका लागि एकै ठाउँबाट सेवा दिने उद्देश्यले स्थापना भएको एकद्वार संकट व्यवस्थापन केन्द्र मार्फत गएको १० महिनाको अवधिमा एक सय ९ जनाले सेवा लिएका छन् ।
हिंसा प्रभावितहरुलाई कानुनी, स्वास्थ्य, सुरक्षा लगायतका सेवा एकै ठाउँबाट दिने उद्देश्यले एकद्वार संकट व्यवस्थापन केन्द्रको स्थापना गरिएको हो । जिल्ला अस्पतालमा रहेको एकद्वार संकट व्यवस्थापन केन्द्रमा हिंसा प्रभावितहरुलाई सेवा दिने गरिएको संयुक्त राष्ट्रसंघीय जनसंख्या कोषका कार्यक्रम संयोजक खगेन्द्र भट्टले बताए ।
संयुक्त राष्ट्रसंघीय जनसंख्या कोषको सहयोगमा सञ्चालन भइरहेको लैंगिक हिंसा रोकथाम र प्रतिकार्य परियोजना अन्तर्गत एकद्वार संकट व्यवस्थापन केन्द्रले सेवा सञ्चालन गर्दै आएको छ । व्यवस्थापन केन्द्र मनोसामाजिक कार्यकर्ताहरुको समेत व्यवस्था गरिएको र उनीहरुले हिंसा प्रभावितहरुलाई मनोसामाजिक परामर्श दिने गरेको भट्टले बताए ।
यस्तै १० महिनाको अवधिमा ४ सय १५ लैंगिक हिंसा प्रभावितहरुलाई मनोसामाजिक परामर्श दिइएको एकद्वार संकट व्यवस्थापन केन्द्रका मनोसामाजिक विमर्शकर्ता पुनम बस्नेतले बताइन् । यस्तै १ हजार ४१४ पुरुष र ७ हजार १७० महिला गरेर ८ हजार ५८४ जनालाई मनोशिक्षा दिइएको उनले बताइन् ।
यस्तै सोही अवधिमा ४६ जना लैंगिक हिंसा प्रभावितले प्रहरीबाट सेवा प्राप्त गरेका छन् २० ओटा हिंसाका घटना अदालतमा दर्ता भएका छन् ।
लैंगिक हिंसा रोकथाम र न्यूनीकरणका लागि ४६ जना स्वास्थ्यकर्मीहरुलाई लैंगिक हिंसा प्रतिकार्य तालिम दिइएको बताइएको छ ।
