बैतडी –बैतडीको सुर्नया गाउँपालिकाले चाडपर्व लक्षित बजार अनुगमन कार्यलाई जारी राखेको छ । दशैंको समयमा संयुक्त बजार अनुगमन टोलीसंग मिलेर बजार अनुगमन गरेको सुर्नयाले अहिले पालिकाभित्रका बजारमा अनुगमन गरिरहेको गाउँपालिकाका उपाध्यक्ष मञ्जु बोहराले बताइन् ।
गाउँपालिका भित्रका बजारमा अनुशासन कायम गर्न, म्याद नाघेका सामग्री विक्रि वितरणमा रोक लगाउन र कालोबजारी हटाउन शनिबारदेखि बजार अनुगमन शुरु गरिएको गाउँपालिकाका प्रमुख प्रशासकीय अधिकृत हिमांशु भट्टले बताए ।
बजार अनुगमनका सिलसिलामा विभिन्न ठाउँबाट दुई दिनमा ४० हजार बराबरको म्याद नाघेको सामग्री फेला पारेर नष्ट गरिएको अनुगमन टोलीकी संयोजक एवं उपाध्यक्ष बोहराले बताइन् ।
पालिकाको टोलीले शनिबार ढोल्यामोड, मोतीनगर लगायतका बजार अनुगमन गरेको थियो । आइतबार पालिकाको वडा नं २ का विभिन्न बजारमा अनुगमन गरिएको हो ।
अनुगमनका क्रममा दर्ता नगरेर सञ्चालनमा रहेका पसलहरुलाई दर्ता गर्न पनि आग्रह गरिएको र उपभोक्ताहरुलाई पनि म्याद हेरेर मात्रै सामग्री खरीद गर्न आग्रह गरिएको उपाध्यक्ष बोहराले बताइन् । बजार अनुगमनलाई निरन्तरता दिने गाउँपालिकाले जनाएको छ ।
