बैतडी- सुदूरपश्चिम दशनामी नाथ योगी समाजले क्यान्सर पीडित रिजन नाथलाई आर्थिक सहयोग गरेको छ । समाजले मंगलबार बैतडीको डिलासैनी गाउँपालिका–६ का महेश नाथ का छोरा क्यान्सर पीडित बालक नाथलाई सहयोग रकम प्रदान गरेको हो ।
सुदूरपश्चिम दशनामी नाथ योगी समाजले संकलन गरेको ३० हजार ३ सय रुपैँया पीडित बालकका बुवा महेश नाथको खातामा जम्मा गरिएको सुदूरपश्चिम दशनामी र नाथ योगी समाजका संयोजक (अभियानकर्मी) मधुसुमन नाथले बताए ।
नाथलाई उपचारका लागि आर्थिक अभाव भएको खबर पाएपछि देश विदेशमा रहेका सबैलाई सहयोगको लागि आग्रह गरेका र सबैले सहयोग पनि गरेका उनले बताए । अझै अन्य सहयोगी मनहरुमा समेत अनुरोध गरिरहेका उनको भनाई छ ।
बालक नाथलाई निसर्ग हस्पिटल धनगढीमा परीक्षण गराउँदा ब्लड क्यान्सरको देखिएको थियोे । हाल उनको भारतस्थित एआइआइएमएस हस्पिटल हरियाणा झज्जरमा उपचार भइरहेको छ । ब्लड क्यान्सर उपचारका लागि झन्डै ३० लाख भारु सम्म खर्च लाग्ने भएकाले पीडित बालकका बुवा महेश नाथ आफैले सहयोगका लागि सबै समक्ष आग्रह गरिरहेका छन् ।
सुदूरपश्चिम दशनामी र नाथ योगी समाजले विभिन्न रोगबाट पीडीत बिरामीहरूलाई आर्थिक सहयोग,सामाजि क्षेत्रमा काम गर्दै आएको छ ।
