बैतडी- जनयुद्धमा घाइते बैतडीका दिपकको उपचारमा समस्या भएको छ । जनगणतन्त्रका लागि माओवादी जनयुद्धमा होमिदा गोलीको छार्रा लागेर घाइते भएका जिल्लाको पञ्चेश्वर गाउँपालिका १ का दिपक चन्दको आर्थिक अभावका कारण उपचारमा समस्या भएको हो ।
दिपकको कम्मरभन्दा मुनिको भाग क्यान्सर रोगले थलिएको छ । उनि १८ वर्षदेखि शरीरमा गोलीको छर्रा बोकेर बाँच्न बाध्यभएका छन् । जनयुद्धमा दिपकको पाखुरामा गोलीको छर्राले घाउ बनाएको थियो । २०६२ भदौमा कालीकोटको पिली भिडन्तमा घाइते भएका दिपकले क्यान्सर रोगको उपचार गर्दा घर खेत बेचिएको बताए ।
उपचारका लागि समस्या भएको उनले बताए । उपचार खर्च जुटाउन गोलीको छर्रासँगै क्यान्सरले खाइरहेको कमजोर शरीरमा उनी कुखुरा, बाख्रा र कालिजपालनमा लागेका छन् । उपचार खर्च जुटाउनकै लागि यस्तो दुःख गर्नु परेको उनले बताए । प्रत्येक तीन महिनामा क्यान्सरविरुद्धको किमो खोप लाग्ने भएपनि आर्थिक अभावले समस्या भएको उनको भनाई छ ।
केहि खर्चको जोहो होला भनेर पशुपन्छी पालनमा लागेको भएपनि किमो लगाउनका लागि समस्या रहेको उनले बताए । तत्कालीन नेकपा माओवादी लडाकुको सातौँ डिभिजनमा सेना समायोजन र प्रमाणीकरणका बेला युएनका प्रतिनिधि र लडाकुबिच दोभाषेका रूपमा काम गर्नुभएको थियो । अङ्ग्रेजी विषयमा स्नातक तहसम्मको अध्ययन गर्नुभएका चन्दले शान्ति प्रव्रिmयापछि फार्मेसी विषयको समेत पढाइ गरेका थिए ।
राज्य व्यवस्था फेर्न भनिएको लडाइँमा होमिएका दीपक अहिले भने क्यान्सर रोगसँग लडिरहेका छन् । आफ्नो पार्टी वा सरकारले दुई लाख रुपियाँ मात्र आर्थिक सहयोग गरेको दिपकले बताए । क्यान्सर रोग फैलिन नदिन चन्दको प्रत्येक तीन महिनामा किमोथेरापी गरिँदै आएको छ ।