बैतडी- बैतडीका दुई विद्यालय भवन पहिरोको जोखिममा परेका छन् । जिल्लाको दशरथचन्द नगरपालिका–४ शाहीलेकमा रहेको वीरेन्द्र मावि र पाटन नगरपालिका–४ कल्तडीमा रहेको नवदुर्गा आधारभूत विद्यालय पहिरोको जोखिममा रहेका हुन् ।
विद्यालयको भवन पछाडिबाट पहिरो खसेकाले विद्यालय भवन पहिरोको जोखिममा परेको वीरेन्द्र माविका प्रधानाध्यापक कैलाशकुमार कनौजियाले जानकारी दिए । पहिरोका कारण छात्र शौचालय, प्रशासनिक भवन र पुस्तकालय बढी जोखिममा परेको उनले बताए ।
विद्यालय भवन तलतिर खसेको पहिरो रोकथामका उपाय अपनाउन नसके थप समस्या निम्तिने अवस्था रहेको प्रधानाध्यापक कनौजियाले बताए । विद्यालय भवन पहिरोको जोखिममा परेको विषयमा प्रहरीले मुचुल्कासहित जिल्ला प्रशासन कार्यालय, पूर्वाधार विकास कार्यालय र सामाजिक विकास कार्यालयमा जानकारी गराइसकिएको विद्यालयले जनाएको छ ।
यस्तै जिल्लाको पाटन नगरपालिका–४ कुणी कल्तडीमा रहेको नवदुर्गा आधारभूत विद्यालयको दुईकोठे भवन पहिरोको जोखिममा परेको छ । यो विद्यालयका विद्यालय व्यवस्थापन समिति अध्यक्ष पदमसिहं विष्टका अनुसार अविरल वर्षाका कारण विद्यालयको सुरक्षाका लागि लगाइएको पर्खाल भत्किएको हो। विद्यालयहरु पहिरोको जोखिममा भएकाले पठनपाठन प्रभावित भैरहेको छ ।