बैतडी- बैतडीको देहिमाण्डौमा लागेको ठुली जातमा १८ जना देउडीया सम्मानित भएका छन् । जिल्लाको दशरथचन्द नगरपालिका वडा नं २ मा रहेको प्रसिद्ध निङ्गलाशैनी भगवती मन्दिरमा अनन्त चतुर्दशीमा लागेको ठुली जात मेलामा १८ जना स्थानीय देउडीया कलाकार सम्मानित भएका हुन् ।
स्थानीय कला संस्कृतिको जगेर्ना गर्न अहम भुमिका खेलेको भन्दै दशथचन्द नगरपालिका वडा नं २, निङ्गलाशैनी चाडपर्व तथा मेला व्यवस्थापन समितिले देउडीयाहरुलाई सम्मान गरेको मेला व्यवस्थापन समिति कोषाध्यक्ष मनोज बोहराले बताए ।
देहिमाण्डौंमा लागेको ठुली जातमा प्रत्यक्ष देउडाखेलेका १८ जना देउडीया सम्मानित भएका उनले बताए । देउडीयाहरुलाई नगद सहित अबिर र खादा लगाएर सम्मान गरिएको बोहराले बताए । बैतडीको विभिन्न ठाउँबाट आएका देउडीयाहरु सम्मानित भएका हुन् । देहीमाण्डौंमा लाग्ने ठुली जातमा प्रत्येक वर्ष देउडीयाहरुलाई सम्मान गरिन्छ । अगामि दिनमा पनि यस्ता सम्मानका कार्यक्रम गरिने मेला व्यवस्थापन समिति कोषाध्यक्ष बोहराले बताए ।
निङ्गलाशैनी भगवती मन्दिरमा भाद्र शुक्ल द्वादशीबाट अनन्त चतुर्दशीको मेला लाग्ने गर्दछ । जात्रामा नेपालका मात्रै नभएर सीमावर्ती भारतीय दर्शनार्थीहरु समेत आउने गरेका छन् । जात्राको अवसरमा देउडा समेत हुने गरेको छ । निङ्गलाशैनी भगवती मन्दिरमा हरेक बर्ष चार पटक जात्रा लाग्ने गर्दछ ।
महाष्टमी र चैत्राष्टमीमा बलिसहित जात्रा हुने भएपनि अनन्त चतुर्दशी र धान्य पूर्णिमाका दिन लाग्ने मेलामा भने बलि दिने चलन नरहेको हो ।
