बैतडी- नेकपा माओवादी केन्द्रका सचिव एवं  सुदूरपश्चिम पार्टी  इन्चार्ज डिलाराम आचार्य अस्वस्थ भएका छन् । आचार्य पार्टीको तीन महिने ‘जनतासँग माओवादी’ नामक विशेष रुपान्तरण अभियानको आवधिक समिक्षाका लागि सुदूर पहाडमा थिए । बैतडीमा कार्यक्रम सम्पन्न गरेर मंगलबार अछाम समीक्षा बैठकमा सहभागी हुन पुगेका आचार्य एक्कासि  अस्वस्थ भएका हुन् ।

सोमबार र  मंगलबार  नेता आचार्य नेकपा माओवादी  बैतडीले  सञ्चालन गरेको अभियानको समिक्षा कार्यक्रम सकेर अछाम गएका थिए ।   कार्यक्रमका लागि अछाम पुगेका  उनको  एक्कासि स्वास्थ्यमा समस्या  आएपछि    बयलपाटा अस्पताल लगिएको थियो । सो  अस्पतालमा उपचार सम्भव नभपछि उनलाई बुधबार   नेपालगञ्ज   लगिएको छ । उनलाई  सेनाको हेलिकप्टर मार्फत नेपालगञ्ज  लगिएको माओवादी केन्द्रका नेता खगराज भट्टले जानकारी दिए ।

आचार्यको एकाएक बोली बन्द हुनुका साथै शरीरको दाहिने भागमा प्यारालाइसिस भएको बताइएको छ । अहिले नेपालगन्ज मेडिकल कलेजमा उनको  उपचार सुरु भैरहेको  छ ।