Sagun Khabar
बैतडी–दार्चुला जोड्ने कर्कले पुल भासियो, दुर्घटनाको जोखिम 

बैतडी –बैतडी–दार्चुला जोड्ने कर्कले पुल भासिएको छ । दार्चुलाको शैल्यशिखर नगरपालिका –३ कर्कले र बैतडीको डिलाशैनी गाउँपालिका –रुद्रेश्वर जोड्ने चमेलिया नदीमाथिको बेलिब्रीज भासिएको हो । 

सो पुलको दार्चुलातर्फको मुख्य पिल्लर भएको ठाउँमा पुरै जमीन भासिएको सवारी चालकहरुले बताएका छन् । पुलको मुख्य पिलर तलतिरको जमीन भासिएपछि दुर्घटनाको जोखिम बढेको छ । 

पुलबाट दैनिक सैयौं साना तथा ठूला सवारी साधन आवतजावत भइरहेकाले दुर्घटनाको जोखिम बढेको स्थानीयहरुले बताएका छन् । 

Atrya hospital

सो पुल भएर बैतडीको रुद्रेश्वर, सिमार, गण्न्ना लगायतका क्षेत्रमा पुगिन्छ भने दार्चुलाको चमेलिया जलविद्युत आयोजना, बिटुले, मार्मा, अपिहिमालको मकिरागाड सम्म आवतजावत गर्ने सवारी साधन यसै पुल भएर गुड्ने गरेका छन् । पुलको तलतिरको जमीन भासिएकाले दुर्घटनाको जोखिम बढेको हो । पुलको समयमै मर्मत सम्भार नभएमा जुनसुकै बेला पनि दुर्घटना हुन सक्ने बताइएको छ । 

पुलको तलतिरको जमीन भासिएको खबर आएको र उक्त पुलको स्थलगत अध्ययनका लागि प्रहरी टोली खटिएको जिल्ला प्रहरी कार्यालय दार्चुलाका प्रवक्ता प्रहरी निरीक्षक ज्ञानेन्द्रबहादुर सिंहले जानकारी दिए । प्रहरीको टोली पुगेपछि यो बिषयमा थप जानकारी हुने उनले बताए । 
 

प्रकाशित मिति: शुक्रबार, मंसिर ८, २०८०  ११:५०
प्रतिक्रिया दिनुहोस्
Weather Update