कैलाली –सुदूरपश्चिम प्रदेशसभाका ४ समितिका सभापति बुधवार निर्विरोध रूपमा निर्वाचित भएका छन् । उनीहरु चारैजनाले पदको शपथग्रहण समेत गरेका छन् ।
प्रदेशसभाका सभामुख भीमबहादुर भण्डारीले एक कार्यक्रमबीच चारैजना सभापतिलाई पद तथा गोपनीयताको शपथ गराएका हुन् ।
विधायन तथा प्रदेश मामिला समितिमा दिवानसिंह विष्ट, सार्वजनिक लेखा समितिमा वीरबहादुर थापा, अर्थ विकास तथा प्राकृतिक स्रोत समितिमा घनश्याम चौधरी र सामाजिक विकास समितिमा माया पन्त निर्विरोध चयन भएका छन् ।
निर्वाचित सभापतिमा विष्ट नेपाली कांग्रेस, थापा नेकपा एमाले, चौधरी नागरिक उन्मुक्ति र पन्त नेकपा एकीकृत समाजवादीका प्रदेशसभा सदस्य हुन् ।
उनीहरूले मंगलवार सभापतिमा मनोनयन गरेका थिए । नेकपा माओवादी केन्द्रले भने प्रदेशसभा बैठक सञ्चालन भएपछि बन्ने विशेषाधिकार समितिको सभापति पाउने सहमति सत्तारुढ दल कांग्रेस, माओवादी केन्द्र, एकीकृत समाजवादी र नाउपाबीच भएको बताइएको छ ।
