बैतडी –बैतडीको पाटन नगरपालिकाले चालु आर्थिक बर्षमा उपभोक्ता समिति मार्फत सञ्चालन गर्नुपर्ने योजनाको अध्यक्षमा महिलामात्रै हुनुपर्ने जनाएको छ । नगरकार्यपालिकाको पहिलो बैठकले नगरभित्र सञ्चालन हुने योजनाको उपभोक्ता समिति अध्यक्षमा महिलामात्रै राख्ने निर्णय गरेकाले सो निर्णय कार्यान्वयन गराउन आग्रह गरेको छ ।
चालु आर्थिक बर्षमा उपभोक्ता समितिबाट काम गराउनुपर्ने योजनाको अध्यक्षमा महिलामात्रै राख्नुपर्ने निर्णय गत जेठ १६ गते बसेको प्रथम कार्यपालिका बैठकले गरेको थियो । सो बैठकको निर्णय नं १० मा उपभोक्ता समितिमा महिलामात्रै अध्यक्ष हुनुपर्ने उल्लेख गरिएको छ ।
नगरपालिकाले वडाहरुलाई पत्र लेख्दै भदौ मसान्तभित्र उपभोक्ता समिति गठन गरिसक्न निर्देशन दिएको छ भने उपभोक्ता समितिमा महिला अध्यक्ष राख्ने निर्णयलाई पूर्ण रुपमा कार्यान्वयन गर्न आग्रह गरेको छ ।
सबै वडा कार्यालयहरुलाई भदौ मसान्तभित्र उपभोक्ता समिति गठन गरिसक्न र त्यस्तो समिति गठन गर्दा महिलामात्रै अध्यक्ष बनाउन आग्रह गरिएको पाटन नगरपालिकाका कार्यबाहक नगरप्रमुख कमलसिंह बोहराले बताए । उनले भने ‘हामीले कार्यपालिकाको पहिलो बैठकबाट उपभोक्ता समिति अध्यक्षमा महिलामात्रै अध्यक्ष बनाउने निर्णय गरेका हौं । सो निर्णय कार्यान्वयन गर्न वडाहरुलाई भनेका छौं ।’
महिलाहरुलाई विकास निर्माणका काममा सहभागी र उनीहरुको क्षमता अभिवृद्धिका लागि यो नीति ल्याएको कार्यवाहक प्रमुख बोहराले बताए ।
नगरपालिकाको यो निर्णयको सामाजिक सञ्जालमा चर्को बहस भएको छ । कतिपयले महिलामात्रै नभएर महिलालाई प्राथमिकता दिनुपर्ने निर्णय गरेको भए राम्रो हुन्थ्यो भनेका छन् । कतिपयले निर्वाचनको बेला गठबन्धन गरेर महिलालाई प्राथमिकता नदिएको र यो निर्णय कसरी गरेको ? भनेर प्रश्न समेत गरेका छन् ।