बैतडी- दशैं नजिकिए संगै भारतसंग सीमा जोडिएको बैतडीको झुलाघाट नाकाबाट स्वदेश फर्कनेको संख्या बढ्दै गएको छ । गएको एक हप्ता यता सीमा नाकाबाट स्वदेश फर्कनेको संख्यामा वृद्धि भएको सीमा प्रहरीचौकी झुलाघाटले जनाएको छ ।
अहिले सीमा नाकाबाट दैनिक ५० देखि ६० जना सम्म नागरिक स्वदेश फर्किरहेका सीमा प्रहरीचौकी झुलाघाटका प्रहरी नायब निरीक्षक योेगेश बहादुर पालले जनाकारी दिए । रोजगारीका लागि भारतका विभिन्न शहर पसेका नेपाली अहिले दशैं मनाउन घर फर्किरहेका उनले बताए ।
घरपरिवार पाल्नका लागि भारतको विभिन्न सहरमा काम गर्ने नेपालीहरु अहिले दशैं मनाउन घर फर्किरहेका छन् । भारतको पिथउरागढ, बरेली, देहरादुन, नयाँ दिल्ली, राजस्थान, हरिद्वार लगायतका विभिन्न सहरमा यहाँ नागरिकहरु कामका लागि जाने गरेका छन् ।
काम विशेषले जहाँसुकै पुगेका भएपनि सारा नेपालीहरू आफूभन्दा सानालाई आशीर्वाद दिन र ठूलाबाट आशीर्वाद लिएर दशैं पर्व मनाउन घर फर्किरहेका हुन् । अहिले सुदूरपश्चिम र कर्णाली प्रदेशका विभिन्न जिल्लाका नागरिक दैनिक रुपमा स्वदेश फर्किरहेका छन् ।
झुलाघाट नाकाबाट दशैंका लागि घर फर्कने सबै नागरिकको सीमामै स्वास्थ्य परीक्षण पनि भइरहेको झुलाघाट हेल्थडेस्कमा कार्यरत हेल्थ असिस्टेन्ट सुरज धामीले बताए ।
स्वदेश फर्किरहेकाहरुको स्वास्थ्य परीक्षण गरेर पठाउने गरिएको उनले बताए । सीमानाकामा रहेको हेल्थडेस्कमा स्वदेश फर्किनेहरुको कोरोना संगै डेंगी, मलेरिया र एचआइभी समेत परीक्षण हुने गरेको बताइएको छ ।
