बैतडी - बैतडी लगायत  सुदूरपहाडमा  विद्युत सेवा  अवरुद्ध भएको छ । आइतबार  बेलुका देखि विद्युत सेवा अवरुद्ध हुँदा उपभोक्ता समस्यामा परेका छन् । विद्युत सेवा बन्द भएपछि  निकै समस्या भएको यहाँका  सेवाग्राहीले बताएका छन्।

विद्युत सेवा अवरुद्ध हुँदा  मोबाइल चार्ज गर्न पनि समस्या भएको  स्थानीय  प्रविन धामीले  बताए । यस्तै विद्युत आपूर्ती  बन्द भएपछि  विद्युतीय उपकरण चलाउन नसकिएको अर्का स्थानीय  चक्रदेव भट्टले  बताए ।

यस्तै विद्युत नहुँदा यहाँका केही रेडियो, एफएमको प्रसारणसमेत रोकिएको हो । यता विद्युत प्राधिकरण वितरण केन्द्र बैतडी प्रमुख पवन भट्टले  भने कैलालीको गोदवरीमा रहेको विद्युतको टावर ढलेपछि विद्युत सेवा अवरुद्ध भएको बताए ।

बैतडी मात्रै नभएर लगातारको वर्षाले टावर ढलेका कारण  सूरदपहाडमा  विद्युत आपूर्ति बन्द भएको उनले बताए । काम भइरहेकाले आज बेलुकी सम्म विद्युत सेवा सञ्चालन हुन सक्ने  उनको  भनाई  छ ।

बिजुली नहुँदा सात पहाडी जिल्लाका नागरिकहरु समसयमा छन् ।विद्युत आपूर्ति गर्न वैकल्पिक व्यवस्था गर्ने काम भइरहेको बताइएको  छ ।