बैतडी- बैतडीको भुमिराज मन्दिरमा लागेको  जात्रा सम्पन्न भएको  छ ।  सुर्नया गाउँपालिका वडा नं  ७ पत्थरककोट  चौथालि स्थित भुमिराज मन्दिरमा लागेको रतेडी  जात्रा सम्पन्न भएको  स्थानीय  दिपेश  कुँवरले जानकारी दिए ।  शुक्रबार  बिसु पर्वका दिन भुमिराज मन्दिरमा रतेडी  जात्रा लागेको उनले बताए ।

भुमिराज मन्दिरमा प्रत्येक वर्ष बिसु पर्वको दिन राति जात्रा लाग्ने  गरेको  थियो । तर  अहिले  भने  १२ वर्ष पछि जात्रा लागेको  हो  । गाउँमा जुठो परेपछि यो मन्दिरमा जात्रा नलाग्ने  गरेको  स्थानीय कुँवरले  बताए । गाउँमा कुनै  पनि मान्छेको  मृत्यु भएमा मन्दिरमा जात्रा रोकिने गरेको  उनको  भनाई  थियो । अहिले वर्षाे पछि मन्दिरमा पुजापाठ सहित जात्रा सम्पन्न भएको  बताइएको  छ ।  

यस्तै  मन्दिरमा बोकाको  बलि दिइएको छ  भने  भक्तजनहरुले  भाकल अनुसार  चिनोबानो समेत चढाए छन । जात्राको समयमा भुमिराज मन्दिरमा सुर्नया गाउँपालिकाका साथै बसाइ सराइ गरेर कैलाली  कञ्चनपुर  गएका नागरिकहरु समेत पुजापाठ गर्न  आउने  गरेका छन् ।

पुजापाठ सहित भुमिराज मन्दिरको दर्शन गरेमा  मनोकामना पूर्ण हुने जनविश्वास रहिआएको छ । बिसु पर्वमा लागेको जात्रामा  सयौँ भक्तजनहरुले पुजापाठ सहित भुमिराजको  दर्शन गरेका जनाइएको  छ ।