बैतडी- बैतडीका जोशीको हत्या घटनामा गाउँकै युवा संलग्न रहेको पाइएको छ । दोगडाकेदार गाउँपालिका–८ का ३८ वर्षिय वाशुदेव जोशीको हत्यामा सोही गाउँका युवा संलग्न रहेका पाइको जिल्ला प्रहरी कार्यालय बैतडीका प्रहरी प्रमुख प्रहरी नायब उपरीक्षक प्रेम बहादुर शाहीले जानकारी दिए ।
गाउँकै एक जना युवाले बाटो ढुकेर शनिबार राति करिब ८ बजेतिर धारिलो हतियारले घाँटी रेटेर जोशीको हत्या गरेको खुल्नमा आएको उनले बताए । संलग्न व्यक्तिको परिचय खुलिसकेको र खोजिकार्य भइरहेको डीएसपी शाहीले बताए । ‘हत्यामा संग्लगन गाउँकै युवा रहेको पाइएको छ, उनि फरार छन्, खोजिका लागि सुरक्षाकर्मी परिचालन गरिएको छ,’ उनले भने । स्थानीयहरुले एक जना युवालाई घटनास्थलमा देखेको थियो । हत्या घटनामा संग्लगन ती युवकको नाम भने प्रहरीले गोप्य राखेको छ ।
हत्या घटनामा अरुपनि संलग्न हुनसक्ने अनुमान प्रहरीको छ । जोशीलाई गत चैत २९ गते एक महिलालाई कुटपिट गरेको आरोप लागेको थियो। जिल्ला प्रहरी कार्यालय पुगेर दुबै पक्षकाबीच मिलापत्र भएको थियो। घटना गत फागुनतिर भएको र दुबै पक्षबीच पुनः बिवाद भएपछि जिल्ला प्रहरी कार्यालय पुगेर सहमती भएपछि घर फर्किएको प्रहरीले जनाएको छ।
योजनाबद्ध तरिकाले गरिएको घटनाको सत्यतथ्य छानविन गरि दोषिमाथि कडा कारबाही हुनुपर्ने आफन्तहरुको माग छ । मृतक जोशीको शव अहिले जिल्ला अस्पताल बैतडीमा राखिएको छ । घटनाबारे थप अनुसन्धान भैरहेको जिल्ला प्रहरी कार्यालय बैतडीका प्रवक्ता प्रहरी निरीक्षक योगेश खत्रीले बताए ।
