बैतडी –बैतडीको पाटनमा गत आइतबार सडक निर्माणका लागि ल्याएको गिट्टीको थुप्रोमा भेटिएको मानिसको टाउको कसको हो भन्ने अझै खुलेको छैन् । सुर्नया गाउँपालिकाको बाचपानीबाट ल्याएको गिट्टीमा मानिसको टाउको भेटिएपछि त्यसलाई परीक्षणका लागि जिल्ला अस्पतालमा राखिएको जिल्ला प्रहरी कार्यालयका प्रवक्ता प्रहरी निरीक्षक लोकराज जोशीले जानकारी दिए । 

आइतबार नै टाउको परीक्षणका लागि अस्पतालमा पुर्याएको र रिपोट आउन बाँकी रहेको प्रहरी निरीक्षक जोशीले बताए । उनले भने ‘फेला परेको टाउको हामीले परीक्षणका लागि जिल्ला अस्पतालमा पठाएका छौं । त्यहाँबाट रिपोट आउन बाँकी रहेको छ ।’

टाउकोको डिएनए परीक्षणका लागि समेत पठाइने प्रहरी निरीक्षक जोशीले बताए । घटनाको अनुसन्धान भइरहेको उनले दाबी गरे । 

यता बाचपानी क्षेत्रमा समेत प्रहरीले आफ्नो अनुसन्धानलाई केन्द्रित गरेको इलाका प्रहरी कार्यालय पाटनका प्रमुख प्रहरी निरीक्षक कमलप्रसाद चौधरीले जानकारी दिए । बाचपानीबाट ल्याएको गिट्टीमा टाउको फेला परेपछि सो क्षेत्रमा पनि प्रहरीले अनुसन्धान केन्द्रित गरेको प्रहरी निरीक्षक चौधरीले जानकारी दिए ।