बैतडी- बैतडीका मूर्तिकार जयबहादुर पार्की अचेत छन् । काष्ठ कलाकर्मीका रुपमा परिचित बैतडीको दोगडाकेदार गाउँपालिका ८ का ३९ वर्षिय पार्की करिब दुई हप्ता देखि अचेत अवस्थामा रहेका भाइ मनोज पार्कीले बताए ।

पारिवारिक स्रोतका अनुसार कञ्चनपुरको शुक्लाफाटा १ कालागवडीमा बस्दै आएका पार्कीको बैशाख २८ गते काम गर्ने बेला एक्कासि स्वास्थ्यमा समस्याको  आएको थियो ।

स्वास्थ्यमा समस्या आएर  अचेत भएका उनलाई  धनगढी स्थित सेती प्रादेशिक अस्पताल लगिएको थियो । अहिले  उनको आईसीयूमा राखेर उपचार भैरहेको र चेत नखुलेको  आफन्त गणेश पार्कीले बताए  । चेकजाँचका क्रममा  डाक्टरले  पार्कीको ब्रेनमा समस्या आएपछि अचेत हुन पुगेका  बताएका छन् ।

उपचाररत पार्कीलाई औषधी किन्न पनि अहिले समस्या भएको छ । करिब दुई हप्ता देखि दाई अचेत अवस्थामा रहेका र  औषधी किन्न पनि समस्या भएको भाइ मनोजले बताए । मूर्ति कोरेर कलाकर्मबाट परिवार पालिरहेका पार्कीको  उपचारमा आर्थिक अभाव भएकाले परिवारले सहयोगका  लागि  सबैलाई अपिल गरेका छ्न् ।

पार्कीले दर्जनौँ मन्दिरमा देवीदेवताका मूर्ति, टुँडाल तथा चित्रकला बनाइसक्नुभएको छ ।उनी काठ, सिमेन्ट र धातुका मूर्ति बनाउने गर्दछन् ।