बैतडी- बैतडीको देहिमाण्डौमा पानी पुगेको छ । कुमालीगाड देहिमाण्डौ लिप्टिङ खानेपानी योजना अन्तर्गत देहिमाण्डौ बजारको सरकोट डाँडामा पानी पुगेको  हो ।

चार वर्ष देखि निर्मार्णाधिन रहेको खानेपानी योजनाको पानी देहिमाण्डौमा पुगेको  स्थानीय एवं एमालेका युवा नेता मनोज बोहराले जानकारी दिए । प्रदेश सरकारको बजेटबाट निर्माण भैरहेको कुमालीगाड देहिमाण्डौ लिप्टिङ योजना निर्माण प्रकृयामै रहेको र सफलतापूर्व देहिमाण्डौमा पानी पुर्याइएको  उनले  बताए ।

कुमालीगाड देखि ५ सय मिटरमाथि (भर्टिकल हाइट) लिफ्टिङ गरेर पानी पुर्याइएको छ । सपलतापूर्वक पानी पुगेको र अब ट्याङ्की निर्माण गरेर घरघरमा  वितरण गरिने दशरथचन्द नगरपालिका वडा नं २ का वडा अध्यक्ष सुर्य बहादुर  बोहराले  बताए ।

केही दिनमै  सरकोट डाँडामा ८० हजार  देखि १ लाख लिटर  सम्म्मको ट्याङ्की  निर्माण कार्य सुरु हुने बताइएको  छ । पानी पुगेपछि नागरिकहरु पनि खुसि भएका कुमालीगाड देहिमाण्डौ लिप्टिङ खानेपानी योजनाका अध्यक्ष उद्धब बहादुर  बोहराले  बताए । यो खानेपानीबाट देहिमाण्डौ बजार लगायत आसपास बसोबास गर्ने  बस्तिका नागरिकहरु लाभान्वित हुने उनले  बताए ।

खानेपानीको  चरम अभाव हुने  देहिमाण्डौमा अब भने  सहज हुने भएको  छ ।  राजनीतिक किचलोका कारण दुई  वर्ष देखि निर्माण कार्य रोकिएको योजनाको  काम अब तिब्र गतिमा हुने सरोकारवालाहरुले  जनाएका छन् ।