बैतडी –बैतडीको सिगास गाउँपालिका घर भई जिल्ला प्रहरी कार्यालय डडेल्धुरामा कार्यरत प्रहरी सहायक निरीक्षक (असई) उमेशकुमार धामी वैशाख महिनाको सर्वोत्कृष्ट प्रहरी बनेका छन् । 

लागुऔषध नियन्त्रणमा विशेष योगदान पु¥याएको र समुदाय प्रहरी साझेदारी कार्यक्रमअन्तर्गत जिल्लाका विभिन्न स्थानहरूमा जनचेतनामुलक कार्यक्रमहरू सञ्चालनमा महत्वपूर्ण भूमिका निर्वाह गरेकाले धामीलाई सर्वोत्कृष्ट प्रहरी घोषित गरिएको जिल्ला प्रहरी कार्यालय डडेल्धुराका प्रमुख प्रहरी नायब उपरीक्षक मनोहरप्रसाद भट्टले बताए । 

जिल्ला प्रहरी कार्यालय डडेल्धुराले संगठनको मर्म अनुसार उत्कृष्ट काम गर्ने प्रहरी कर्मचारीलाई सर्वोत्कृष्ट प्रहरी घोषित गर्दै आएको छ । हरेक महिना गरेको कामका आधारमा सर्वोत्कृष्ट प्रहरी घोषित गर्ने गरिएको डिएसपी भट्टले बताए । 

नेपाल प्रहरी विशेष सुरक्षा गण महेन्द्रनगर कञ्चनपुर दरबन्दी भएका धामी हाल अढाई वर्षदेखि डडेल्धुरामा कार्यरत छन् ।

बैतडीको सिगास गाउँपालिका–५ खैरकोट घर भएका धामीले पढाइमा स्नातक गरेका छन् ।