बैतडी –शिक्षा र स्वास्थ्यमा सबै नागरिकको पहुँच पुर्याउन प्रदेश सरकार प्रतिबद्ध रहेको सुदूरपश्चिमका आन्तरिक मामिला तथा कानुन मन्त्री शिवराज भट्टले बताएका छन् । मंगलबार मणिलेक मावि काँडा मेलौलीको ७६ औं बार्षिकोत्सवमा बोल्दै मन्त्री भट्टले दुर्गमका नागरिकको शिक्षा र स्वास्थ्य क्षेत्रमा समान किसिमले पहुँच पुर्याउन सकेमात्रै संघीयताको अर्थ हुने बताए ।
सामुदायिक विद्यालयहरुको शैक्षिक गुणस्तर सुधारका लागि सरकारका तर्फबाट गर्न सकिने सबै कार्य गर्न आफू प्रतिबद्ध रहेको उनले बताए । मणिलेक मावि तल्लोसोराड क्षेत्रको पुरानो शैक्षिक संस्था भएकाले यसको विकास र विस्तारमा पनि आफूले सक्दो पहल गर्ने उनले बताए । उनले भने ‘शिक्षा क्षेत्रको विकासका लागि मैले सक्ने जति प्रयास गर्नेछु । यहाँहरुले दिएको सल्लाह सुझाव अनुसार अगाडि बढ्नेछु ।’
यस्तै सोही कार्यक्रममा बोल्दै मन्त्री भट्टले विगतमा तल्लोसोराडमा पुगेर मुख्यमन्त्री कमलबहादुर शाहले गरेको प्रतिबद्धता पूरा गर्न पनि सरकार लागि परेको बताए । तल्लोसोराड क्षेत्रमा विद्युतीकरणको कामलाई तीव्रता दिइने उनको दाबी छ ।
मेलौलीमा देखिएको खानेपानी समस्या समाधानका लागि पनि आफूले पहल गर्ने र यो समस्या छिटै समाधान हुने मन्त्री भट्टले बताए । उनले भने ‘म यो क्षेत्रको सांसद पनि हुँ । यो क्षेत्रका समस्या समाधानमा मेरो ध्यान केन्द्रित हुनेछ ।’
विद्यालयको बार्षिकोत्सव समारोहमा बोल्दै मेलौली नगरपालिकाका प्रमुख भीमबहादुर चन्दले शिक्षा क्षेत्रको विकासका लागि नगरपालिकाले सक्दो सहयोग गर्ने बताए ।
बार्षिकोत्सव समारोहमा बिद्यालयका प्रधानाध्यापक देवदत्त कलौनीले बार्षिक प्रतिबेदन प्रस्तुत गरेका थिए । उनले सार्वजनिक गरेको प्रतिवेदन अनुसार गत आर्थिक बर्षमा ४ करोड ६२ लाख ७५ हजार २ सय ९९ रुपैयाँ आयव्यय रहेको बताए ।
विद्यालयमा अहिले १ करोड ११ लाख ९१ हजार ४४७ रुपैया मौज्दात रहेको प्रधानाध्यापक कलौनीले बताए ।
बार्षिकोत्सवमा समारोहमा विभिन्न सांस्कृति कार्यक्रम समेत प्रस्तुत गरिएका थिए ।