बैतडी–बैतडीको डिलाशैनी गाउँपालिका क्षेत्रभित्र भोलि सार्वजनिक बिदा दिइएको छ । वडा नं ५ स्थित कफालशैनी भगवती मन्दिरमा लाग्ने जात्राको अवसरमा पालिका क्षेत्रभित्र भोलि सार्वजनिक बिदा दिइएको गाउँपालिकाले जारी सूचनामा उल्लेख गरिएको छ ।
कफलाशैनी भगवती मन्दिरमा कार्तिक शुक्ल अष्टमी र नवमीमा राँगाको बलिसहित जात्रा लाग्ने भएकाले पालिका क्षेत्रभित्रका सबै सरकारी तथा गैरसरकारी कार्यालय, शिक्षण संस्था लगायतमा सार्वजनिक बिदा दिइएको गाउँपालिकाका प्रवक्ता यज्ञराज भट्टले बताए ।
कफलाशैनी भगवती मन्दिरमा लाग्ने जात्रालाई व्यवस्थित बनाउन मेलास्थल आसपासमा मदिरा, जुवातास लगायतका कार्यहरु पूर्ण रुपमा बन्द गरिएको वडा नं ५ को कार्यालयले जनाएको छ ।
सूचनाको उल्लंघन गरेर कसैले मदिराको सेवन, कारोबार र ओसारपोसार तथा जुवातास खेले वा खेलाइएको पाइएमा कानुन अनुसार कारवाही हुने वडा अध्यक्ष यज्ञराज भट्टले जानकारी दिए ।
