बैतडी –जिल्ला समन्वय समिति बैतडीको यही जेठ २४ गते हुने निर्वाचनका लागि उम्मेदवारहरुको अन्तिम नामावली प्रकाशन गरिएको छ । शनिबार मनोनयन दर्ता भएका उम्मेदवारहरुको आइतबार अन्तिम नामावली प्रकाशन गरिएको मुख्य निर्वाचन अधिकृत तिलकबहादुर कार्कीले बताए ।
यस्तै उम्मेदवारहरुलाई चुनाव चिन्ह समेत प्रदान गरिएको छ । पार्टीका तर्फबाट उम्मेदवार बनेकाहरुलाई पार्टीकै चुनाव चिन्ह र स्वतन्त्र उम्मेदवारलाई पुतली चुनाव चिन्ह प्रदान गरिएको मुख्य निर्वाचन अधिकृत कार्कीले बताए ।
जिल्ला समन्वय समितिको निर्वाचनका लागि नेपाली कांग्रेस, नेकपा माओवादी केन्द्र र स्वतन्त्रबीच गठबन्धन भएको छ भने एमाले एक्लै चुनावी मैदानमा उत्रेको छ ।
जिल्ला समन्वय समितिको प्रमुखका लागि गठबन्धनबाट नेपाली कांग्रेसका खगेन्द्रसिंह धामीको उम्मेदवारी रहेको छ भने एमालेबाट मोहनबहादुर थापाको उम्मेदवारी रहेको छ । यस्तै उपप्रमुख पदका लागि गठबन्धनबाट नेकपा माओवादी केन्द्रका दमनबहादुर कुँवरको उम्मेदवारी परेको छ भने एमालेबाट हेमा भट्ट (कपाडी)को उम्मेदवारी परेको छ ।
यस्तै खुला तीन सदस्यका लागि गठबन्धनबाट नेपाली कांग्रेसका करनसिंह कठायत र दानबहादुर बिष्ट तथा नेकपा माओवादी केन्द्रका प्रेमसिंह भाटको उम्मेदवारी रहेको छ । एमालेबाट ईश्वरबहादुर बोहरा, कालुसिंह जोशी र दिपेन्द्रबहादुर धानुकको उम्मेदवारी रहेको छ ।
यस्तै तीन महिला सदस्यका लागि गठबन्धनबाट नेपाली कांग्रेसका यशोदा चन्द र हरु नेपाली तथा माओवादी केन्द्रका निर्मला भट्टको उम्मेदवारी रहेको छ । यस्तै एमालेबाट चन्द्रा जोशी (पाण्डेय) र यशोदा महराको उम्मेदवारी परेको छ ।
यस्तै एकजना दलित सदस्यका लागि गठबन्धनबाट स्वतन्त्रका हरना सार्की र एमालेबाट द्रोपती दयालको उम्मेदवारी रहेको मुख्य निर्वाचन अधिकृतको कार्यालयले जनाएको छ ।
जिल्ला समन्वय समितिको निर्वाचनका लागि जेठ २४ गते बिहान ७ बजेदेखि ९ बजे सम्म मतदान गर्ने कार्यतालिका रहेको मुख्य निर्वाचन अधिकृत कार्कीले बताए । जिल्ला समन्वय समितिको निर्वाचनमा पालिकाका प्रमुख र उपप्रमुखले मतदान गर्न पाउने प्रावधान रहेको छ ।
जिल्ला समन्वय समितिको निर्वाचनमा नेपाली कांग्रेस, माओवादी केन्द्र र स्वतन्त्र सहितको गठबन्धनसंग १२ मत रहेको छ भने एमालेसंग ८ मत मात्रै रहेको छ ।
