बैतडी- बैतडीको मेलौली नगरपालिकामा तालाबन्दी गरिएको छ । १५ शैय्याको अस्पताल तोकिएको ठाउँमा निर्माणको माग गर्दै वडा नं १ का स्थानीयहरुले बिहीबार पालिकामा तालाबन्दी गरेका हुन् ।
अस्पताल वडा नं १ को बिठ्ठनेमा बनाउनका लागि जग्गा उपलब्ध भइसकेपश्चात पनि पालिकाले स्थान छनोट गरेर अन्यत्र बनाउने चलखेल गर्न खोजेपछि पुरानै ठाउँमा अस्पताल बन्नु पर्ने माग गर्दै तालाबन्दी गरिएको स्थानीय दशरथ नायकले जानकारी दिए ।
अस्पताल निर्माणका लागि जग्गादान गर्ने जग्गादाता र अन्य स्थानीयहरुले तालाबन्दी गरेका बताइएको छ । बिठ्ठनेमा अस्पताल निर्माण गर्न १५ रोपनि जग्गादान भसकेपछि पनि अन्यत्र सार्न खोजिएपछि आक्रोसित स्थानीयहरुले नगरपालिकाको च्यानल गेट, स्वास्थ्य शाखा , शिक्षा शाखा लगायतका अन्य शाखाहरुमा ताला बन्दी गरेका स्थानीय नायकले बताए ।
पालिकाको जननिर्वाचित प्रतिनिधि पुरानो ठाउँमा अस्पताल निर्माण गर्ने निर्णयमा नपुग्दा सम्म तालाबन्दी नखुल्ने स्थानीयहरुको भनाइ छ । यता नगरपालिकाका स्वास्थ्य शाखा प्रमुख नारायण चन्दले पनि स्थानीयहरुले वडा नं १ मा आधारभूत अस्पताल निर्माण हुनु पर्ने माग गर्दै ताला लगाएका बताए । वडा नं १ र ७ मा अस्पताल निर्माणका लागि जग्गा प्राप्त भएपनि कुन ठाउँमा बनाउने निर्णय भने भइनसकेको पालिकाले जनाएको छ ।
संघीय सरकारले २०७० सालमा मेलौलीमा १५ शैय्याको अस्पताल निर्माणका लागि निर्णय गरेपनि अहिले सम्म विवादकै कारण बन्न सकेको छैन् ।
यता वडा नं. ७ का बासिन्दाहरुले केशरपुर प्राथमिक स्वास्थ्य केन्द्र मेलौली रहेकै स्थानमा १५ शैय्याको अस्पताल निर्माण हुनुपर्ने माग गर्दै आएका छन् ।
