बैतडी- बैतडीमा नेपाली कांग्रेसका वडा सभापतिले राजीनामा दिएका छन् । जिल्लाको डिलाशैनि गाउँपालिका वडा नं ३ का काँग्रेस वडा सभापति सोभान सिंह बोहराले पार्टीबाट बुधबार राजीनामा दिएका हुन् । राजीनामा दिएका उनले काँग्रेसका बागी हरिमोहन भण्डारीलाई सघाउने बताएका छन् ।
प्रदेश सभा क्षेत्र नं १ मा स्वतन्त्र उम्मेदावरी दिएका कांग्रेस बागी भण्डारीको पक्षमा जनलहर रहेको र आफु पनि चुनावमा सघाउने उनको भनाई छ । कांग्रेस बागी भण्डारी अहिले चुनावी प्रचारप्रसारमा व्यवस्त छन् ।
जिल्लाको पाटन नगरपालिका र पुर्चाैडी नगरपालिकामा सम्पर्क कार्यालय स्थापना गरेको हरिमोहन भण्डारीको टोलिले निर्वाचन परिचालन कमिटि गठन गरेर अहिले चुनावी प्रचारप्रसारलाई तिब्रता दिइरहेको छ । बैतडीमा काँग्रेसले टिकट नदिएको भन्दै बागी उठेका उम्मेदवारहरुले गठबन्धनका उम्मेदवारको दिमाग खराब गरेको छ ।
उम्मेदवारी फिर्ता गर्न अनुरोध आग्रह गरिएपनि काँग्रेस बागीहरु चुनाव जित्ने रणनीतिका साथ चुनावी मैदानमा उत्रिएका छन् । बैतडीमा टिकट नदिएछि नेपाली काँग्रेसका नेता केशब बहादुर चन्द र नेता हरिमोहन भण्डारीले स्वतन्त्र उम्मेदवारी दिएका थिए । चन्दले प्रतिनिधिसभा सदस्य र भण्डारीले प्रदेश सभा क बाट उम्मेदवारी दिएका हुन् ।
अहिले पनि नेपाली काँग्रेस बैतडी लगायत अन्य गठबन्धन भित्रका दलका नेताहरुले बागी फकाउने प्रयास जारी राखेपनि उनिहरुले फिर्ता नलिने अडानका साथ चुनावी प्रचारलाई आक्रामक बनाएका छन् ।
