बैतडी –गठबन्धनका शीर्ष नेताहरु आउने भएपछि बैतडीको पाटन झकिझकाउ पारिएको छ । प्रधानमन्त्री एवं नेपाली कांग्रेसका सभापति शेरबहादुर देउवा, पूर्व प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल (प्रचण्ड) र पूर्व प्रधानमन्त्री एवं एकीकृत समावजादीका अध्यक्ष माधव कुमार नेपाल आउने भएपछि जिल्लाको पाटन झकिझकाउ पारिएको हो ।
पाटन बजारको गेट र बजार क्षेत्रमा तीनै पार्टीका झण्डा , नेताहरुको पोष्टर टाँसिएका छन् भने कार्यक्रम हुने खुल्ला मञ्च पनि सजाइएको छ ।
लोकतान्त्रिक–बाम गठबन्धनले आयोजना गरेको चुनावी सभालाई सम्बोधन गर्नका लागि तीनै नेता बैतडी आउन लागेका हुन । कार्यक्रम भोलि दिउँसो १ बजे हुने बताइएको छ । चुनावी सभालाई देउवा, प्रचण्ड नेपालले सम्बोधन गर्ने कार्यक्रम रहेको नेपाली कांग्रेस बैतडीका सचिव देवराज जोशीले बताए । पाटनमा आयोजना हुने चुनावी सभाका लागि तयारी पूरा भएको उनले बताए ।
बिहान ११ बजे दार्चुलाको गोकुलेश्वरमा आयोजना हुने चुनावी सभालाई सम्बोधन गरेर नेताहरु बैतडीको पाटन आउने कार्यक्रम तय भएको हो ।
