बैतडी-बैतडीको पञ्चेश्वरकी रमा लुहार छोरीको हत्या पछि अचेत अवस्थामा छिन् ।  छोरी माया लुहार (भुरी)को घाँटी रेटी हत्या भएपछि उनी अचेत अवस्थामा रहेकी हुन् ।

पञ्चेश्वर ४ फ्याउलेकी मायाको हत्या पछि अहिले  गाउँ शोकमग्न भएको छ ।  छोरीको हत्याको खबर पछि  आमा रमा छाति पिटेर रोइ रहेकी छिन् । उनी होस बिहोस छिन्। यो पीडाले उनको होसहवास गुमेको छ । रमा  होसमा आएपछि छोरीलाइ खोज्छिन् । उनी मायाको आउने बाटो हेरेर  रुन्छिन ।

छोरीलाइ डाँको लगाएर बोलाउँछिन् । माया कहिले आउँछे भनेर छोराहरुलाइ सोध्छिन । छोराहरुले  माया जिउँदै छे ,आउछे आमा भनेर सम्झाउछन् बल्ल उनी शान्त हुन्छिन तर अचेत अवस्थामा भएका बेला उनले छोराले भनेको विश्वास गरेपनि  फेरि हत्याको खबरले रुन्छिन र मायाको खोजि गर्छिन ।

मायाकी आमा चार दिन देखि भोकै छिन्। उमेरले ५५  वर्ष काटि सकेकी उनको यो घट्नाले शारीरिक  अवस्था  बिग्रिदै  गएको  छ । बहिनीको हत्या पछि आमाले चार दिन सम्म  खान समेत नखाएर अचेत भएपछि छोराहरु चिन्तित भएका छन्  । बहिनी गुमाउँदाको पीडा त छदै छ , आमाले  खाना खाएकी छैनन्  , यो अवस्थाले आमालाई पनि गुमाए हामी कहाँ जाने के गर्ने,  छोरा टिंकु लुहार  भक्कानिन्छन  ।, अंनेकौ पीडा खेप्दै आएकी रमा अहिले पुत्री वियोगले झन पीडामा छिन् । एक वर्षको अवधिमा लुहार परिवारमा चार ओटा घट्ना घटेका छन् ।

श्रीमानको र  जेठि छोरीको मृत्युुको पीडा सेलाउन नपाउँदै रमा लुहारको घरमा कान्छी छोरीको हत्याले  रुवाबासी चलेको छ  । छोरीको हत्या,  मृतक माया संगै बजार गएकी नातनी नेहा लुहार   गम्भीर  घाइते भएर अस्पतालको श्यामा छटपटाइ  रहेकी छिन् । मृतक माया  दिदीका छोरा छोरीका लागि कपडा किनेर ल्याउछु भन्दै कुलाउँ बजार गएकी थिइन् ।तर उनी सोही  दिनबाट कहिल्यै नफर्किने गरेर  परिवारलाई छोडेर गइन्  ।

 माया लुहार  (भुरी) को मृत्यु पछि साथी संगी , इष्टमित्र भावविह्वल भएका छन् । घर परिवार गाउँ समाज सबैकी प्यारी मायाको घाँटी रेटी निर्मम हत्यापछि  अहिले सारा गाउँ रोइरहेको छ । २१  वर्षीया माया लुहारको हत्यामा संलग्न रहेको भन्दै पिडित परिवारले किटानी जाहेरी पनि दिएका छन् ।

मृतकका आफन्तले शिवनाथ गाउँपालिका ४ सोलपला घर भएका सशस्त्र प्रहरी जवान समेत रहेका भरत राम कोलीको नाममा किटानी जाहेरी दिएका हुन् । आरोपित कोलीले केही दिन अगाडि मायाको मोबाइल खोसेको र मोबाइल लैजान बोलाएर हत्या गरेको मृतकका परिवार बताउँछन् । आरोपित सशस्त्र  प्रहरी जवान भरत कोलीले नै बहिनीको हत्या गरेको मृतक मायाका दाइहरुको दाबी छ  ।

माया लुहार मंगलबार घरबाट  कुलाउ गएकी र घर नफर्केपछि खोजी गर्दै जाँदा बुधबार शिवनाथ गाउँपालिका ६ स्थित शिवनाथ मन्दिर नजिकै घाँटी रेटी हत्या गरेको अवस्थामा उनको शव फेला परेको थियो । उनीसंगै कुलाउ गएकी मृतककी भदै नेहा लुहार घाँटीमा धारिलो हतियार प्रयोग गरी घाइते अवस्थामा फेला परेकी थिइन् ।

उनी शिवनाथ र पञ्चेश्वर गाउँपालिकाको सिमाना लामाडाँगा भन्ने स्थानमा फेला परेकी थिइन् । अहिले  सम्म दोषीलाइ पक्राउ  गर्न नसकेको भन्दै यहाँका नागरिकहरु आक्रोसित  छन् । प्रहरी प्रशासनले  आरोपित पक्राउ गर्न ढिलाइ गरिरहेको भन्दै यहाँका  नागरिकहरु अब सशक्त आन्दोलन गर्ने चेतावनी दिइरहेका  छन्  ।प्रहरीले  भने आरोपित कोलीको  खोजि भइरहेको  बताएको  छ ।