बैतडी –बैतडीको पञ्चेश्वर गाउँपालिका–४ की २१ वर्षीया माया लुहारको हत्या आरोपमा पक्राउ परेका सशस्त्र प्रहरी जवान भरतराम कोली भारत भाग्नै लाग्दा समातिएको खुलेको छ । प्रहरीका अनुसार कोली भारततर्फ भाग्न भनेर कञ्चनपुरको महेन्द्रनगर पुगेका थिए ।
शिवनाथ गाउँपालिका–४ सोलपालाका २२ वर्षीय कोली आइतबार बिहान महेन्द्रनगरस्थित बसपार्कबाट पक्राउ परेका हुन् । कोलीलाई पक्राउ गरेर बैतडी ल्याउन लागिएको जिल्ला प्रहरी कार्यालय प्रवक्ता प्रहरी निरीक्षक लोकराज जोशीले बताए । उनले भने ‘कोलीलाई पक्राउ गरेर बैतडी ल्याउन लागिएको छ । यता आइपुगेपछि थप सोधपुछ हुन्छ ।’
कोली सशस्त्र प्रहरीको हुल तथा दंगा तालिम व्यवस्थापन शिक्षालय पोखरामा कार्यरत थिए । यसअघि मृतक मायाका आफन्तले कोलीको नाममा किटानी जाहेरी दिएका थिए ।
मायाको बुधबार शिवनाथ गाउँपालिका–६ शिवनाथ मन्दिर नजिकै घाँटी रेटेर हत्या गरेको अवस्थामा शव फेला परेको थियो । उनकी १५ वर्षीया भदै नेहा लुहार घाँटीमा धारिलो हतियार प्रयोग गरेर घाइते अवस्थामा भेटिएकी थिइन् । उनी पञ्चेश्वर गाउँपालिका र शिवनाथ गाउँपालिकाको सीमास्थित बालाडाँडामा रक्ताम्य अवस्थामा फेला परेकी थिइन् । घाइते नेहाले दिएको बयानका आधारमा आरोपी कोली पक्राउ परेका हुन् ।
माया र नेहा मंगलबार घरबाट लुगा सिलाउन भनी पञ्चेश्वर गाउँपालिका ३ कुलाउ गएका थिए । बुधबारसम्म पनि घर नफर्केपछि घरपरिवार र प्रहरीले खोजतलास गरेको थियो। खोजतलास गर्दै जाँदा बुधबार मायाको शव तथा नेहा घाइते अवस्थामा भेटिएकी थिइन् ।
मंगलबार मायाको हत्या गरेर कोली बैतडीबाट भागेका बताइएको छ । डडेल्धुरा हुँदै उनी कञ्चनपुर पुगेका प्रहरीले जनाएको छ । महेन्द्रनगर पुगेर भारत भाग्ने सुरमा रहेका कोलीलाई बसपार्क डिउटीमा रहको प्रहरी टोलीले पक्राउ गरेको हो । उनको दायाँ हातको औंला आलो खत रहेको छ । केही दिन सामाजिक सञ्जाल टिकटकमा उनले आफ्नो हातमा चोट लागेको उल्लेख गरेका थिए ।
कोलीलाई बैतडी पुर्याएपछि अदालतबाट म्याद थपेर अनुसन्धान प्रक्रिया अघि बढ्ने प्रहरी निरीक्षक जोशीले बताए ।
