बैतडी – पिकनिक मनाउन बैतडीको दशरथचन्द नगरपालिका–६, शेरा गएका युवा जीवन बुडालको शव आइतबार चौलानी नदीबाट निकालिएको छ । दशरथचन्द नगरपालिका–१० खडेनी घर भएका २५ वर्षीय जीवन बुडाल राष्ट्रिय अनुसन्धान बझाङमा कार्यरत रहेको खुलेको छ । परिवारको रोहबरमा प्रहरीले लाइफ ज्याकेटको प्रयोग गरि बुडालको शव आइतबार नदीबाट निकालिएको जिल्ला प्रहरी कार्यालयका प्रमुख प्रहरी नायव उपरीक्षक प्रेमबहादुर शाहीले बताए ।
शनिवार दिउँसो जीवन बुडालसहित १२ जना साथी पिकनिक मनाउन चौलानी नदी किनारमा गएका थिए । ती मध्ये बुडाल राति चौलानी नदीमा मृत भेटिएका प्रहरीले जनाएको छ ।
मृतक युवाको शव निकालेर पोष्टमार्टमका लागि जिल्ला अस्पताल बैतडी पुर्याइएको छ । शवको पोष्टमार्टपछि मात्रै मृत्युको कारण खुल्ने प्रहरी नायव उपरीक्षक शाहीले बताए ।
घटना बारे प्रहरीले पिकनिकमा सहभागी भएका अन्य ११ जनामाथि सोधपुछ गरिरहेको छ । पिकनिक मनाउनसंगै गएकाहरुसंग सोधपुछ भइरहेको र घटनाका बिषयमा विस्तृत अनुसन्धान भइरहेको प्रहरीले जनाएको छ ।
