बैतडी –बैतडीमा एकजना शिक्षकले जनप्रतिनिधिलाई कुटपीट गरेको आरोप लागेको छ । जिल्लाको सिगास गाउँपालिका ६ स्थित गणेश माविका शिक्षक महेन्द्र साउँदले सोही वडाका वडा सदस्य कृष्णबहादुर साउँदलाई कुटपिट गरेका हुन् ।
शेरा लेकम सिँचाई सिचाई योजनाको बारेमा विवाद हुदा शिक्षक महेन्द्रले वडा सदस्य सोमबार कृष्णमाथी कुटपिट गरेको आरोप लागेको छ । वडा सदस्य साउँदको टाउको र औँलामा चोट लागेको छ । वडा सदस्य साउँदले गाउँपालिकाको न्यायिक समितिमा उजुरी दिएको बताए । उनले भने ‘सेरा लेकम सिँचाइ आयोजनाको बिषयमा म माथि कुटपीट भएको छ । मेरो औंला र टाउकोमा चोट लागेको छ ।’
घटनाका बिषयमा बुझ्न खोज्दा वडा अध्यक्ष तेजबहादुर साउँदले आफू काम विषेशले धनगढीमा रहेको बताए । कार्यबहाक अध्यक्षको रुपमा कृष्ण बहादुर साउँदलाई जिम्मेवारी दिएको र विवादको बारेमा खासै जानकारी नभएको उनले बताएका छन् ।
घटनाको बिषयमा जानकारी आएको र वडा अध्यक्ष धनगढीबाट फर्केपछि यो बिषयमा छलफल गरिने गाउँपालिकाकी उपाध्यक्ष धाना धामीले बताइन् ।
कुटपीट गरेको आरोप लागेका शिक्षक महेन्द्र साउँदले भने आफूलाई पहिला कुटपीट गरेको र त्यसपछि आफूले प्रतिकार गरेको उनले बताए । उनले भने ‘मलाई उपभोक्ता समिति गठन भइसकेको अवस्थामा वडासदस्यले मलाई गालीगलौज गरेर हातपात गरेका हुन् । त्यसपछि मैले पनि प्रतिकार गरेको हुँ ।’
