बैतडी- बैतडीको सेटिगाउँ बहुमुखी क्याम्पसमा नेकपा एमाले निकट अनेरास्ववियु र माओवादीको विद्यार्थी संगठन अखिल क्रान्तिकारीबिच चुनावि तालमेल भएको छ। आसन्न स्ववियु निर्वाचनका लागि उनीहरुबिच तालमेल भएको हो ।
शनिबार उनीहरुले संयुक्त रुपमा उम्मेदवारी दर्ता गराएका छन। सभापतिका लागि अखिल क्रान्तिकारीका मोहन बोहरा उम्मेदवार बनेका विद्यार्थी नेता आशिष मालले बताए । यस्तै सचिवमा रमेश माल र कोषाध्यक्षमा मनोज जोशी उम्मेदवार बनेका छन्। उनीहरु भने अनेरास्ववियुबाट हुन। स्ववियु निर्वाचन चैत्र ५ गते हुँदै छ ।
सेटिगाउँ बहुमुखी क्याम्पसमा १ सय ७० मतदाता रहेका छन् । शनिबार उम्मेदवारीसँगै विगत १४ वर्षदेखि नियमित हुन नसकेको स्ववियु निर्वाचन हुने सुनिश्चित भएको छ । सेटिगाउँ बहुमुखी क्याम्पसमा अनेरास्ववियु र अनेरास्ववियु अखिल (क्रान्तिकारीका)साझा उम्मेदवार मोहन बहादुर बोहराले सभापतिको उम्मेदवारी दिएका हुन् ।
त्रिभुवन विश्वविद्यालय (त्रिवि) मा हुने स्वतन्त्र विद्यार्थी युनियन (स्ववियु) निर्वाचनका लागि देशभर जस्तै बैतडीका क्याम्पसहरुमा पनि शनिबार उत्साहजनक रुपमा उम्मेदवारी दर्ता भएको छ ।
