बैतडी-बैतडीको पुर्चौडी नगरपालिकाका नागरिकहरु नेपाल टेलिकमको सेवा प्रभावकारी नहुँदा परेसान भएका छन् । टावर आउने जाने समस्याले त्यहाँका नागरिकहरु परेसान भएका हुन् ।
घाम लागेको बेला टावर आउने आकाशमा बादल देखिए टावर अस्ताउने भएपछि समस्या भएको स्थानीय करन कुवँरले बताए । नेपाल टेलिकमका टावरले काम गर्न छाडेपछि सम्पर्क विहिन हुने गरेका उनले बताए । नगरपालिकाको वडा नं ५ कुवाकोट र वडा नं ८ मल्लादेहिमा नेपाल टेलिकमका टावर छन् ।
कतिबेला टावर आएपनि काम नगर्ने भएपछि उच्च ठाउँहरुमा गएर कुराकानी गर्नेु पर्ने बाध्यता रहेको कुँवरको भनाई छ । टावरको समस्याले सूचना आदान प्रदान गर्न समस्याहुने गरेको स्थानीय बागमती ऐरले बताइन् । नगरपालिकाको माथिल्लो गाउँहरुमा टावरले काम गरेपनि नगरपालिकाको सदरमुकाममा धेरै समस्याहुने गरेको उनले बताइन् ।
हाट बजार लगायतका क्षेत्रमा बसोवास गर्ने नागरिकहरु नेपाल टेलिकमको सेवाबाट झन हैरान भएका हुन् । टावरले काम नगर्दा सूचना आदान प्रदान गर्न नागरिकहरुलाई समस्या छ । टावरमा आएको खराबीले नागरिकहरु सञ्चार सेवाबाट बञ्चीत भएपनि सम्बन्धित निकायले यसमा ध्यान दिन नसकेको नागरिकहरुको भनाई छ ।
सोलार प्यालनलबाट सञ्चालित टावरले मौसममा खराबी आउँदा काम नगर्ने भएकाले समस्या हुने गरेको छ । धेरै टावरमा विद्युत आपूर्ति नहुदा पनि समस्या भएको हो । जिल्लाभरी नेपाल टेलिकमका अधिकाँश टावर सोलार प्यानलबाट चार्ज हुने टावर भएकाले बेला बेला समस्या आइरहन्छ ।
बिग्रिएपछि समयमै मर्मत नहुँदा नागरिकहरु समस्यामा पर्ने गरेका छन् ।जिल्लाका अन्य स्थानीयतहका नागरिकहरु समेत सोलार प्यानबाट सञ्चालित टावरले प्रभावकारी काम नगर्दा समस्यामा छन् ।
