बैतडी - बैतडी लगायत सुदूर पहाडमा फेरी हिमपात भएको  छ ।  आइतबार  राति उच्च भूभागहरुमा हिमपात  भएको  हो ।

उच्च लेकाली क्षेत्रहरुमा हिमपात भएको स्थानीयहरुले बताएका छन् । बैतडीको खोड्पे, श्रीभावर लगायतका उच्च क्षेत्रमा हिमपात भएको खोड्पेका स्थानीय मोहन   विष्टले  बताए । खोड्पेमा यो वर्ष  तेस्रो पटक   हिमपात भएको  उनले बताए । गएको तीनदिनदेखि मौसममा बदली आएको र राति  हिमपात भएको उनले बताए । यस्तै श्रीभावर, ढोल्यामोड,गर्जे लगायतका उच्च क्षेत्रमा समेत  हिमपात भएको छ ।

यसैगरी बझाङको बित्थडचीर लगायत लेकाली र हिमाली क्षेत्रमा हिमपात भएको छ  भने दार्चुलाका उच्च लेकाली र हिमाली क्षेत्रमा पनि हिमपात भएको स्थानीयहरुले बताएका छन् । हिमपात भएसंगै उच्च क्षेत्रहरुमा चिसो बढेको छ । चिसोका कारण जनजीवन प्रभावित बनेको स्थानीयहरुको भनाइ छ । यो बर्ष हिउँदमा खासै बर्षा र हिमपात भएको थिएन् । हिउँद सकिएपछि  बर्षा र हिमपात भैरहेको  छ ।