बैतडी–बैतडीको दशरथचन्द नगरपालिका २ देहीमाण्डौं क्षेत्रमा चितुवाले मानिसमाथि आक्रमण गर्न थालेपछि स्थानीयबासी त्रसित भएका छन् । सोमबार देहीमाण्डौं ज्वाँकट्टेका मानसिंह धामीलाई गोठालो गएको बेला चितुवाले आक्रमण गरेको थियो ।
घर नजिकैको खरफागलामा बाख्रा चराइरहेका धामीमाथि चितुवाले आक्रमण गरेको हो । अरु गोठालाहरु पनि संगै भएकाले चितुवालाई धपाएका थिए । बस्ती नजिकै आएर चितुवाले आक्रमण गर्न थालेपछि स्थानीयबासी त्रसित बनेका देहीमाण्डौंका स्थानीय कृष्णबहादुर बोहराले बताए ।
दिनदहाडै चितुवाले मानिसमाथि आक्रमण गर्न थालेपछि स्थानीयबासीहरु त्रसित भएका बोहराले बताए । बस्ती नजिकै आएर चितुवाले आक्रमण गर्नथालेपछि समस्या भएको उनले बताए ।
जंगलबाट आहाराको खोजीमा आएको चितुवाले मानिसमाथि आक्रमण गरेको हुन सक्ने अनुमान गरिएको छ । चितुवाले मानिसमाथि आक्रमण गर्न थालेपछि सचेतता अपनाउनुपर्नेमा स्थानीय भगीरथ लावडले जोड दिए । उनले भने ‘जंगल नजिक एक्लै जानु भएन् । स्थानीयहरुले सचेतना अपनाउनु आवश्यक छ ।’
चितुवाको बासस्थान नष्ट भएका कारण मानवबस्तीमा देखिन थालेको जानकारहरुले बताएका छन् ।
