बैतडी –सरकारी कार्यालयहरुले उपभोक्ता समितिमार्फत सञ्चालन गर्नुपर्ने योजनाहरुमा २० प्रतिशत श्रमदान गर्नुपर्ने भएपनि पाटन नगरपालिकाले भने उपभोक्ता समितिमार्फत सञ्चालन गर्नुपर्ने योजनाहरुमा १० प्रतिशत मात्रै जनश्रमदान नियम लागू गरेको छ । 

चालु आर्थिक बर्षदेखि उपभोक्ता समितिमार्फत सञ्चालन गरिने योजनाहरुमा १० प्रतिशत जनश्रमदान गर्नुपर्ने नियम बनाइएको नगरपालिकाको योजना शाखामा कार्यरत बिरसिंह महताले बताए । 

जनश्रमदान कागजी रुपमा मात्रै २० प्रतिशत हुने र जनश्रमदान नगर्ने  प्रवृति बढ्दै गएपछि जनश्रमदानको सीमा घटाइएको महताले बताए । उनले भने ‘हामीले सञ्चालन गर्ने योजनाहरुलाई दिगो र प्रभावकारी बनाउन जनश्रमदानको अवधारणा आएको हो । तर पछिल्लो समयमा कागजी रुपमा मात्रै जनश्रमदान देखिनथालेपछि हामीले १० प्रतिशत जनश्रमदानको व्यवस्था गरेका हौं ।’

नगरपालिकाबाट सञ्चालित योजनाहरुमा साँच्चिकै नागरिकको सहभागिता होस भनेर जनश्रमदानको प्रतिशत घटाइएको पाटन नगरपालिका वडा नं ८ का वडा अध्यक्ष एवं नगरपालिकाको सामाजिक विकास समितिका संयोजक हरिश बिष्टले बताए । नगरपालिकाबाट सञ्चालित योजनाहरुमा उपभोक्ताहरुको सहभागिता सुनिश्चितताका लागि १० प्रतिशतमात्रै जनश्रमदानको अवधारणा ल्याइएको उनले बताए । उनले भने ‘जनश्रमदान अब कागजमात्रै नहोस,फिल्डमै होस भनेर हामीले १० प्रतिशत जनश्रमदानको अवधारणा ल्याएका हौं । आफ्नो गाउँठाउँमा सञ्चालित योजनाहरुमा १० प्रतिशत जनश्रमदान गर्न हामीले सबैलाई आग्रह गरिरहेका छौं ।’

जनश्रमदानको काम कागजमामात्रै देखाउने प्रवृतिले योजनाहरु दिगो र गुणस्तरीय रुपमा सम्पन्न नहुने र बजेटमात्रै कटौतीमात्रै हुने भएकाले १० प्रतिशत श्रमदानको अवधारणा ल्याइएको समिति संयोजक संयोजक बिष्टले बताए । 

नगरपालिकाबाट सञ्चालित योजनाहरुलाई प्रभावकारी रुपमा सञ्चालन गर्न जनश्रमदानको दायरा घटाइएको नगरपालिकाका इन्जिनियर गोविन्द पन्तले बताए । नगरपालिकाले वडामै पुगेर उपभोक्ता समितिका पदाधिकारीहरुलाई योजना सम्पन्न गर्दा ध्यान दिनुपर्ने कुराहरुको बारेमा जानकारी दिने गरेको उनले बताए ।