काठमाण्डौ – ऊर्जा, जलस्रोत तथा सिँचाइमन्त्री कुलमान घिसिङले पदबाट राजीनामा दिएका छन् । हिजो बेलुकी प्रधानमन्त्री निवास बालुवाटरमा पुगी मन्त्री घिसिङले प्रधानमन्त्री सुशीला कार्कीसमक्ष राजीनामा पेश गरेका हुन् ।
भौतिक पूर्वाधार तथा यातायात र शहरी विकास मन्त्रालयको पनि जिम्मेवारी सम्हाल्दै आएका घिसिङ गएको भदौ ३० गते मन्त्री नियुक्त भएका थिए । राष्ट्रिय स्वतन्त्र पार्टी (रास्वपा) को उपसभापति बन्ने सहमति भएपछि उनलाई वर्तमान गैरदलीय सरकारबाट राजीनामा दिन दबाब बढेको थियो ।
मन्त्री पदबाट राजीनामा दिएपछि पत्रकार सम्मेलन गर्दै घिसिङले आफूले पदमा रहँदा देश र नागरिकलाई केन्द्रमा राखेर काम गर्ने प्रयास गरेको बताए । आफूले लिएको राजीनामाको निर्णय जिम्मेवारीबाट विमुख हुने प्रयास नभई आत्मसम्मान, नैतिककता, सिद्धान्त र नागरिकप्रतिको प्रतिबद्धताको निरन्तरता भएको उनको भनाइ छ ।
घिसिङले उज्यालो नेपाल पार्टी र रास्वपाबीच भएको सहमतिमा आफ्नो नाम उल्लेख भए पनि सहमति अहिलेसम्म औपचारिक रूपमा कार्यान्वयनमा नआएको बताए । आफ्नो समर्थन र सद्भाव रहँदारहँदै पनि अहिलेसम्म कुनै राजनीतिक पार्टीका सदस्यता नलिएको उनको दाबी छ । घिसिङले अब आफ्नो सक्रिय राजनीतिक जीवन शुरू हुने जानकारी पनि दिए ।
