बैतडी –बैतडीको पाटनमा निर्माणाधिन बसपार्क अलपत्र परेको छ । आर्थिक बर्ष २०७१÷७२ मा निर्माण शुरु गरिएको बसपार्क अहिले सम्म पूरा हुन सकेको छैन् । पाटन नयाँ शहर आयोजना अन्तर्गत बसपार्क निर्माण भइरहेको भएपनि निर्माण शुरु भएको ८ बर्ष बितिसक्दा समेत बसपार्क निर्माणको काम सम्पन्न हुन सकेको छैन् ।
पाटन नयाँ शहरमा व्यवस्थित बसपार्कको अवधारणा अन्तर्गत बसपार्क निर्माणको काम शुरु भएपनि विभिन्न कारणले अझै पनि बसपार्क निर्माण कार्य सम्पन्न हुन नसकेको पाटन नयाँ शहर आयोजना कार्यालयका सूचना अधिकारी इन्जिनियर रोहितराज भण्डारीले बताए ।
१३० मिटर लम्बाइ र ४५ मिटर चौडाइको बसपार्क अन्तर्गत ९० प्रतिशत काम पूरा भइसकेको भएपनि केही काम बाँकी रहेको इन्जिनियर भण्डारीले बताए । बसपार्क अन्तर्गत काउन्टर भवन र आरसीसी बाटो निर्माण कार्य बाँकी रहेको छ । सो कार्यका लागि ठेक्का जिम्मा पाएको प्रमोद कन्सट्रक्सनलाई काम अघि बढाउनका लागि ताकेता गरिएको उनले बताए ।
निर्माण कम्पनीसंग गरिएको सम्झौताको म्याद गएको असारमै सकिएको थियो । निर्माण कम्पनीले म्याद थपका लागि निवेदन दिएको भएपनि म्याद थप भने भएको छैन् । गएको मंसिरमा निर्माण कम्पनीलाई सातदिनभित्र काम शुरु गर्न भनेर आयोजना कार्यालयले पत्र पठाएको थियो । त्यसपछि केही काम गरेको जानकारीमा आएको इन्जिनियर भण्डारीले बताए ।
काम सम्पन्न नगरेमा सार्वजनिक खरीद ऐन २०६३, सार्वजनिक खरीद नियमावली २०६४, खरीद सम्झौता र प्रचलित कानुन अनुसार कार्य सम्पादनमा जमानत जफत गरी कालोसूचीमा राख्ने प्रक्रिया अघि बढाइने निर्माण कम्पनीलाई दिएको पत्रमा उल्लेख गरिएको छ । निर्माण कम्पनीलाई कालो सूचीमा राख्ने वा नराख्ने भन्ने बिषयमा अबको आइतबार निर्णय हुने इन्जिनियर भण्डारीले बताए ।
समयमै बसपार्क निर्माण कार्य सम्पन्न नहुँदा बनेका संरचनाहरु समेत जीर्ण हुन थालेका छन् । पाटनमा सवारी साधनको चापलाई ध्यानमा राखेर बसपार्क निर्माणको काम अघि बढाएको भएपनि समयमै बसपार्क निर्माणको काम सम्पन्न नहुँदा स्थानीयबासी समेत निराश बनेका छन् ।
८ ओटा बस र ४ ओटा जिप एकै पटक पार्किङ गर्न सक्ने क्षमताको बसपार्क निर्माणमा ढिलाइ हुँदा सवारी साधन बजारमै पार्किङ गर्ने गरिएको छ । यसले गर्दा दुर्घटनाको समेत जोखिम बढ्दै गएको स्थानीय व्यवसायी राकेश जोशीले बताए । उनले भने ‘बसपार्क निर्माण नहुँदा सवारी साधन बजारमै पार्किङ गर्ने गरिएको छ । यसले बजारमा आवतजावत गर्ने मानिसहरुलाई समस्या भएको छ ।’
बसपार्क निर्माण कार्य अन्तर्गत अपांगमैत्री शौचालय, बस र जिपका लागि छुट्टाछुट्टै पार्किङ, आरसीसी बाटो, काउन्टर भवन निर्माण गरिने उल्लेख छ । तर अहिले सम्म काउन्टर भवन नबन्दा समस्या भएको बताइएको छ ।
