बैतडी –जिल्ला प्रशासन कार्यालय बैतडीले कार्यालयमा पुगेका सेवाग्राहीलाई सहजतापूर्वक सेवा प्रदान गर्न प्रयास गरिरहेको जनाएको छ । सेवाग्राहीको सजिलोका लागि प्रशासन कार्यालयभित्रै सूचना प्रविधि सहायता कक्ष सञ्चालनमा ल्याइएको जिल्ला प्रशासन कार्यालयका सूचना अधिकारी शंकरबहादुर बोहराले बताए ।
सूचना प्रविधि कक्षबाट राहदानी तथा राष्ट्रिय परिचय पत्रको निशुल्क प्रि–इनरोलमेन्ट सेवा प्रदान भइरहेको सूचना अधिकारी बोहराले बताए । यसका साथै सेवाग्राहीहरुलाई आवश्यक पर्ने फारमहरु निशुल्क रुपमा उपलब्ध भइरहेको जिल्ला प्रशासन कार्यालयले जनाएको छ ।
गएको पौषदेखि सूचना प्रविधि कक्षा सञ्चालनमा ल्याइएको र यसले सेवाग्राहीहरुलाई सहज भएको प्रमुख जिल्ला अधिकारी सुरेश पन्थीले बताए । प्रशासनले प्रदान गरिरहेको सेवामा कुनै अप्ठ्यारो भएमा कार्यालयले जानकारी गराउन समेत आग्रह गरिएको छ ।
प्रशासनले निशुल्क रुपमा सूचना प्रविधि कक्षबाट प्रदान गरिरहेका सेवा उपभोग गर्न समेत स्थानीय प्रशासनले आग्रह गरेको छ । फारम भर्न र राहदानी तथा राष्ट्रिय परिचय पत्रको प्रि–इनरोलमेन्ट सेवाका लागि नागरिकलाई समस्या भएपछि प्रशासनले यी सेवाहरु आफ्नै हाताभित्र सञ्चालन गरेको हो ।
फारमकै लागि समेत नागरिकले धेरै पैसा खर्च गर्नुपर्नेस्थिती आएपछि सेवाग्राहीको सहजताका लागि सूचना प्रविधि कक्ष सञ्चालनमा ल्याइएको जिल्ला प्रशासन कार्यालयले जनाएको छ ।
