बैतडी- बैतडीको सतबाँझ  बजारमा सिसीटिभी क्यामेरा जडान हुने भएको  छ । जिल्लाको  सुर्नया गाउँपालिका वडा नं  २ मा रहेको सतबाँझ बजारमा  यो आर्थिक वर्ष भित्रै  सिसीटिभी क्यामेरा जडान हुने भएको हो ।

पालिकाको  मुख्य बजार सतबाँझमा आर्थिक वर्ष २०७९÷८० मै सिसीटिभी क्यामेरा जडान गरिने गाउँपालिकाका अध्यक्ष अम्मरबहादुर कुँवरले  जानकारी  दिए । सिसीटिभी क्यामेरा जडानका लागि सबै  संग सल्लाह लिएर योजना बनाइ सकेको  उनले  बताए ।

मुख्य  व्यापारीक केन्द्रका रुपमा विकास हुँदै  गएको  सतबाँझ बजारमा सिसीटिभी क्यामेरा आवश्यक देखिएपछि जडानको तयारी भइरहेको उनले  बताए । बजार क्षेत्रमा हुने  अपराधिक कृयाकलाप नियन्त्रणका लागि सिसीटिभी क्यामेरा जडानको  अवधारणा अघि सारिएको अध्यक्ष कुँवरले बताए ।

दशरथचन्द र महाकाली राज मार्गको बिच भागमा रहेको सतबाँझ बजार पछिल्लो समय व्यापारिक केन्द्रका रुपमा विकास हुँदै गएको छ । सुर्नया गाउँपालिकाको मुख्य  बजार सतबाँझमा  अहिले बैँङकिङ कारोबार समेत हुन्छ । नेपाल इन्भेष्टमेन्ट बैँकले यो ठाउँमा बैँकिङ सेवा प्रदान गरिरहेको  हो । यस्तै सतबाँझ बजारमा बासवसाइको व्यवस्था सहितका होटेल सञ्चालनमा छन् भने दैनिक उपभोग्यका सामान, लत्ताकपडा,निर्माण सामग्री समेत यहाँ पाइन्छन् ।

झुलाघाट लगायतका बजारमा गएर सामान ल्याउने यहाँका नागरिकहरु अहिले सतबाँझ बजारमा सामान  खरिद विक्री गर्ने गरेका छन् । सतबाँझ बजारमा सिसीटिभी क्यामेरा जडान गर्ने पालिकाको योजना राम्रो रहेको स्थानीय भरतमोहन भट्टको भनाई  छ । बजार क्षेत्रमा लाग्ने सिसीटिभी क्यामेराले अपराधिक कृयाकलपा नियन्त्रण हुने  अपेक्षा गरिएको  छ ।