बैतडी –राष्ट्रिय प्राकृतिक श्रोत तथा बित्त आयोगले तयार पारेको कार्यसम्पादन सूचक मूल्यांकनमा बैतडीका १० ओटा स्थानीय तहमध्ये दोगडाकेदार गाउँपालिका अग्रस्थानमा देखिएको छ ।
१७ सूचकका आधारमा स्थानीय तहको कार्यसम्पादन मूल्यांकन गर्दा दोगडाकेदार अग्रस्थानमा देखिएको हो । स्थानीय तहको हकमा समयमा बजेट पेस गरे–नगरेको, असार मसान्तभित्र बजेट पास गरे–नगरेको, राजस्व बाँडफाँट गरे–नगरेकोदेखि बजेट बेरुजु, विद्यालयमा विद्यार्थी भर्नाको अवस्था, गर्भवतीको संख्यालगायत सूचकलाई मूल्यांकनको आधार मानिएको छ ।
यस्तै स्वास्थ्य संस्थामा सुत्केरी हुनेको संख्या, पूर्ण खोप पाएका बालबालिकाहरुको संख्या, चार पटक गर्भजाँच गराएको महिलाको संख्या लगायतलाई पनि सूचकमा राखिएको छ ।
आयोगले आर्थिक वर्ष २०८०÷८१ का लागि वित्तीय समानीकरण अनुदान सिफारिस गर्ने प्रयोजनका लागि यस्ता सूचकका आधारमा स्थानीय सरकारको कार्यसम्पादन मूल्यांकन गरेको हो ।
कार्यसम्पादन सूचक मूल्यांकनमा दोगडाकेदार गाउँपालिकाले ६४.३९ अंक प्राप्त गरेको छ । पुछारमा रहेको डिलाशैनी गाउँपालिकाले ४६.८१ अंक प्राप्त गरेको छ ।
दशरथचन्द नगरपालिकाले ६२.११, पाटन नगरपालिकाले ५८.५५, शिवनाथ गाउँपालिकाले ५८, पुर्चाैडी नगरपालिकाले ५६.९५, सिगास गाउँपालिकाले ५६.६५ अंक प्राप्त गरेको छ ।
सुर्नया गाउँपालिकाले ५०.३०, पञ्चेश्वर गाउँपालिकाले ५० र मेलौली नगरपालिकाले ४८.११ अंक प्राप्त गरेको राष्ट्रिय प्राकृतिक श्रोत तथा बित्त आयोगले प्रकाशन गरेको कार्यसम्पादन मुल्याङ्कनमा उल्लेख गरिएको छ ।
