बैतडी –बैतडीको सुर्नया गाउँपालिका वडा नं ७ स्थित शिखरपुर स्वास्थ्यचौकीको सार्वजनिक सुनुवाई तथा सामाजिक परीक्षण कार्यक्रम सम्पन्न भएको छ । स्वास्थ्यचौकी सञ्चालन तथा व्यवस्थापन समितिका अध्यक्ष एवं सुर्नया गाउँपालिका वडा नं ७ का वडा अध्यक्ष भक्तबहादुर कुँवरको अध्यक्षतामा सम्पन्न भएको सार्वजनिक सुनुवाई तथा सामाजिक परीक्षण कार्यक्रममा स्थानीय सरोकारवालाहरुको सहभागिता रहेको थियो । 

शुक्रबार सम्पन्न भएको सार्वजनिक सुनुवाई तथा सामाजिक परीक्षण कार्यक्रममा स्वास्थ्यचौकी इन्चार्ज बीरबहादुर बोहराले संस्थाको आर्थिक, भौतिक तथा सामाजिक प्रतिवेदन प्रस्तुत गरेका थिए । 

स्वास्थ्यचौकी इन्चार्ज बोहराले प्रस्तुत गरेको प्रतिवेदन अनुसार स्वास्थ्यचौकीको गत आर्थिक बर्षको आयतर्फ २ लाख ११ हजार ५२० रुपैंया, व्ययतर्फ १ लाख ९५ हजार ७४२ रुपैंया र बचत १५ हजार ७७८ रुपैंया रहेको छ । 

यस्तै स्वास्थ्यचौकीले गत आर्थिक बर्षमा सम्पादन गरेका कामहरुको विवरण सरोकारवालाहरुलाई जानकारी गराइएको स्वास्थ्यचौकी इन्चार्ज बोहराले बताए । 

स्वास्थ्यचौकीले नेपाल सरकारका प्राथमिकताप्राप्त कार्यक्रमहरुलाई प्रभावकारी ढंगले सञ्चालन गरिरहेको जनाएको छ । स्वास्थ्यचौकीमार्फत खोप कार्यक्रम, पोषण कार्यक्रम, परिवार नियोजन सेवा, सुरक्षित मातृत्व कार्यक्रम, समुदायमा आधारित बालरोगको एकीकृत व्यवस्थापन कार्यक्रम, राष्ट्रिय महिला स्वास्थ्य स्वयंसेविका कार्यक्रम, सरुवा रोग नियन्त्रण कार्यक्रम, नसर्ने रोग उपचार तथा नियन्त्रण कार्यक्रम र उपचारात्मक सेवा प्रदान भइरहेका स्वास्थ्यचौकी प्रमुख बोहराले बताए ।