पहिरोको कारण जयपृथ्वी राजमार्ग अवरुद्ध
बैतडी –लगातारको बर्षाका कारण खसेको पहिरोले जयपृथ्वी राजमार्ग अवरुद्ध भएको छ । राजमार्ग अन्तर्गत बैतडीको झौलेक र श्रीभावरमा गएराति पहिरो खस्दा सडक अवरुद्ध भएको जिल्ला प्रहरी कार्यालय बैतडीका प्रवक्ता प्रहरी निरीक्षक लोकराज जोशीले बताए ।
पहिरो पन्छ्याउनका लागि पहिरो खसेको ठाउँमा डोजर पुगिसकेको प्रहरी निरीक्षक जोशीले बताए । पहिरो पन्छ्याउने काम भइरहेकाले सडक सुचारु हुने उनले बताए ।
राजमार्ग अवरुद्ध हुँदा बझाङ जाने सवारी साधन, बैतडीको पुर्चौंडी र सिगास जाने सवारी साधन र बझाङबाट अन्यत्रका लागि छुटेका सवारी साधन बीचबाटोमै रोकिएका छन् ।
यस्तै पहिरोका कारण अवरुद्ध भएको दशरथचन्द राजमार्ग सुचारु भएको छ । राजमार्ग अन्तर्गत सतबाँझ नजिकै खसेको पहिरो पन्छ्याएपछि केहीबेर अगाडिदेखि राजमार्ग सुचारु भएको प्रहरी निरीक्षक जोशीले बताए ।
प्रकाशित मिति: सोमबार, साउन २९, २०८० ०७:३१
प्रतिक्रिया दिनुहोस्
थप बैतडी
साताको लोकप्रिय
