बैतडी –सुदूरपश्चिम प्रदेशमा भोलि र पर्सि सार्वजनिक बिदा दिइएको छ । सुदूरपश्चिमेलीको मुख्य पर्व  गौराको अवसरमा प्रदेश सरकारले भदौ ७ र ८ गते प्रदेशभर सार्वजनिक बिदा दिएको हो । 

गौरा पर्व सुदूरपश्चिमको पहाडी समुदायले मनाउने सबैभन्दा ठूलो लोकपर्व हो । यो प्रदेशका बैतडी, दार्चुला, डडेल्धुरा,बझाङ, डोटीसहितका जिल्लामा यो पर्व मनाउने परम्परा रही आएको छ । यसका साथै कैलाली र कञ्चनपुरमा पनि यी जिल्लाबाट बसाइसराई गरेर गएकाहरुले गौरा मनाउने गर्दछन् । 

यो पर्वमा गौरा र महेश्वरको पूजाआजा गर्ने चलन रही आएको छ । बिरुडापञ्चमीका दिन भिजाएका बिरुडाले गौरादेवीको पूजाआजा गर्ने गरिन्छ । 

पौराणिक कालमा हिमालय पुत्री गौरीले कठोर व्रत बसेर भगवान शिवशङ्करलाई पतिका रूपमा पाएको धार्मिक मान्यता रहेकाले गौरा पर्वमा महिलाहरू सौभाग्य प्राप्तिका लागि निराहार व्रत बस्ने चलन छ ।

गौरा पर्व भाद्र शुक्ल वा कृष्ण पक्षमा मनाइने भएपनि यो बर्ष अगस्ती उदयको दोष भएकाले श्रावण शुक्ल पक्षमा मनाएको नेपाल पञ्चाङ्ग निर्णायक विकास समितिले जनाएको छ । 

तर प्रदेशकै कतिपय ठाउँमा भने भदौ १८ गतेदेखि मात्रै गौरा मनाउने तयारी भएको छ । गौरा पर्व भदौ शुक्ल वा कृष्ण पक्षमा मात्रै मनाउने परम्परा र शास्त्रीय मान्यता रहेकाले भदौ २१ गते गौराष्टमी परेको आचार्य घनश्याम लेखकले बताए । 

गौरा एकादशी र जनैपूर्णिमा अघि दुबधागो धारण गर्ने परम्परा नरहेको भन्दै कतिपय ठाउँमा भदौ २१ गते गौराष्टमी मनाउने तयारी भएको हो ।