बैतडी –बडादशैंको अवसरमा बैतडीका विभिन्न शक्तिपीठ तथा मन्दिरहरुमा पूजाआजा र जात्राको क्रम चलिरहेको छ । घटस्थापनाका दिन सामूहिक जमरा राखेपछि शक्तिपीठ तथा मन्दिरहरुमा जात्रा भइरहेका छन् । जिल्लाका प्रसिद्ध धार्मिक स्थल मध्येको अनिरुद्र मन्दिरमा आज जात्रा लाग्दैछ । आश्विन शुक्ल चतुर्थीका दिन अनिरुद्र मन्दिरमा जात्रा हुने गर्दछ ।
बैतडीको सुर्नया गाउँपालिका ६ मूलखटालीस्थित मूलथान र अन्य ठाउँमा रहेका अनिरुद्र मन्दिरमा आज जात्रा लाग्ने अनिरुद्र मन्दिरका मूल पूजारी विनोदप्रसाद अवस्थीले बताए ।
हरेक बर्ष नवरात्रको चतुर्थी र महाष्टमी तिथीमा अनिरुद्र मन्दिरमा जात्रा हुने गरेको उनले बताए । अनिरुद्र देवताको पूजाआजा गरेमा विद्या प्राप्त हुने जनविश्वास रही आएको उनले बताए । अनिरुद्र देवतालाई वेदका धनी देवताको रुपमा पूजाआजा गर्ने गरिएको छ ।
अवस्थीहरुको कुल देवताको रुपमा समेत अनिरुद्र देवताको पूजाआजा गर्ने गरिएको छ । बह्रमरुपी देवता भएकाले अनिरुद्र देवताको पूजाआजा गरेमा सुख,शान्ति, समृद्धि र ऐश्वर्य प्राप्त हुने अनिरुद्र मन्दिरका अर्का पूजारी गणेशदत्त अवस्थीले बताए ।
अनिरुद्र मन्दिरमा असोज शुक्ल चतुर्थी र महाष्टमी, चैत शुक्ल चतुर्थी र अष्टमी, माघ शुक्ल चतुर्थी र भदौ शुक्ल चतुर्थीका दिन जात्रा तथा पूजाआजा हुने अनिरुद्र मन्दिरका पूजारी अवस्थीले बताए ।
बैतडीको सुर्नया ६ स्थित मूलखटालीमा अनिरुद्र देवताको मुख्य मन्दिर रहेको छ । सो मन्दिरमा हरेक बर्ष टाढाटाढाका दर्शनार्थीहरु पुग्ने गर्दछन् । यो बर्ष पनि अनिरुद्र मन्दिरको दर्शनका लागि बसाइसराई गरेर गएकाहरु पनि पुख्र्यौली थलोमा फर्किएका पूजारी विनोदप्रसाद अवस्थीले बताए ।
सुर्नया साथै पाटन नगरपालिका, सिगास गाउँपालिका, बझाङ, डडेल्धुरा लगायतका क्षेत्रमा पनि अनिरुद्र देवताको पूजाआजा हुने गरेको पूजारी अवस्थीले बताए । आयत्री गोत्र भएका अवस्थीहरुको बसोबास भएको ठाउँमा अनिरुद्र देवतालाई कुल देवताको रुपमा पूजाआजा गर्ने गरिएको छ । अनिरुद्र देवताको दर्शन गरेमा मनोकामना पूर्ण हुने जनविश्वास रही आएको छ ।
